Биһиги быйыл күндү ийэлэрбитигэр анаан, гипстэн хаартыска уурар оҥорон бэлэхтээбиппит. Биһиги бу оҥоһук оҥорорбутугар уу, гипстэн оҥоһук оҥорор анал порошок, сүрэх быһыылаах форма, скрепка, прищепка ылбыппыт.
Учууталбыт Людмила Афанасьевна хайдах оҥорорго үөрэппитэ, уолаттар уонна кыргыттар бары биир күн кэлэн олус түргэнник оҥорбуппут. Хас биирдии оҕо дьиэ кэргэнин эбэтэр ийэтин кытта түспүт хаартыскатын учууталбытыгар ыытан бэчээттэппиппит, ол иһин наһаа үчүгэй, биһиги бэйэбит илиибитинэн оҥорбут бэлэхпититтэн ийэлэрбит үөрбүттэрэ. Маҕаһыынтан бэлэми атыылаһыах оннугар маннык бэйэ оҥоруу киһиэхэ быдан күндү дии санаатыбыт.
Ариана Тимофеева,
М.Е.Васильева аатынан 2-c Малдьаҕар орто оскуолатын
7 кылааһын үөрэнээччитэ