Доруобуйаларынан хааччахтаах оҕолорго аналлаах өрөспүүбүлүкэтээҕи реабилитационнай Киин иитиллээччилэрэ, итиэннэ Мэҥэ Хаҥалас оҕолорго аналлаах социальнай-реабилитационнай Киинигэр эмтэнэр оҕолор, Тойбохойдооҕу, Мохсоҕоллоохтооҕу Оҕо дьиэлэрин, мөлтөхтүк истэр оҕолор оскуолаларын үөрэнээччилэрэ Оҕо көмүскэлин күнүгэр бэлэх тутан үөрдүлэр-көттүлэр.
“Үтүө дьыала” аһымал аахсыйаны “Атлант-Саха” сис доруобуйатын Киинин салайааччыта Сайдам Михайлов көҕүлээтэ.
Аахсыйаҕа С.А.Новгородов аатынан “Айар” кинигэ кыһата, “Азбука”, “Сахаада” маҕаһыыннар (ЧП В.Г. Стручков) көхтөөхтүк кытыннылар. Реабилитационнай Киин иитиллээччилэрэ уонна үлэһиттэрэ инникитин травматолог-ортопед, массажист, реабилитолог өҥөтүнэн туһаныахтара. Мөлтөхтүк истэр оҕолор оскуолаларыгар “Атлант-Саха” 10 сертификаты анаата.
Ону таһынан Сайдам Михайлов “Кэскил” хаһыат сыл иккис аҥаарыгар сурутуутун Майатааҕы социальнай реабилитационнай Кииҥҥэ, итиэннэ Сунтаар улууһугар Тойбохойдооҕу оҕо дьиэтигэр бэлэхтээтэ.
Оҕо ааҕыытын, бэчээтин өйүүр төрөппүт, предприниматель Сайдам Григорьевич Михайловка “Кэскил” оҕо бэчээтин кыһатын аатыттан истиҥник махтанабыт.
Жанна Леонтьева.