Дьокуускай куорат «Туймаада» стадионугар «JOYFEST-2023» III бэстибээлэ буолан ааста. Тэрээһини Ыччат дьыалатыгар уонна социальнай коммуникацияларга министиэристибэ, Физическэй култуураҕа уонна спортка министиэристибэлэр өйөбүллэринэн Спидкубинг федерациятын уонна «JOY» маҕаһыын сылын ахсын ыыталлар.
Оҕо көмүскэлин күнүгэр «Туймаада» стадион киэҥ уораҕайа оҕо аймаҕынан туолла. Манна араас тэрилтэлэр, маҕаһыыннар, оҕо дьоҕурун сайыннарар кииннэр оҕолорго аналлаах бэйэлэрин өҥөлөрүн көрдөрдүлэр, оҕолору аралдьыттылар.
Былассааккалар өйү сайыннарыы, спорт, айар дьоҕур, үөрэх, о.д.а. хайысхаларынан үлэлээтилэр.
Спидкубинг федерацията кубик-рубигы хомуйуу уонна өйү сайыннарар “головоломкаҕа», остуол оонньуутун федерацията хабылыкка, хаамыскаҕа, 5 №-дээх ДЮСШ дуобакка, «JOY» хамаандата «HIQU» оонньууну ыыттылар.
Бэстибээл дьиэ кэргэн тэрээһинэ буоларын быһыытынан ордук улахан интэриэһи ХИФУ физкультура уонна спорт института тэрийбит спортивнай туризм күрэҕэ тарта. Манна дьиэ кэргэнинэн кыттар буолан, күрэх бэрт долгутуулаахтык, көхтөөхтүк ааста. «SkazkaBaby» маҕаһыын куонкуруһугар кырачааннар беговелы миинэн куоталастылар.
«Кэскил» оҕо бэчээтин кыһата бэйэтэ таһаарар «Кэскил» хаһыакка, «Бэлэм буол», «Юность Севера», «Чуораанчык», «Колокольчик» сурунаалларга сурутууну ыытта.
Уруһуйдьут оҕолор ордук Ева Борисова ыыппыт аквагрим маастар-кылааһын сэргээтилэр уонна Архитектура уонна дизайн студиятын «Якутск – город будущего» диэн уруһуй куонкуруһугар кытыннылар. «Чорон-21 век» тэрилтэ маастар-кылааһыгар оҕолор туой буор, керамика, мас оҥоһуктарга холоннулар.
«Харысхал» аһымал пуондата доруобуйаларыгар хааччахтаах оҕолорго остуол оонньууларын тэрийдэ. «Шаг в мир звуков» мөлтөхтүк истэр кохлеарнай имплантаах оҕолору реабилитациялыыр тэрилтэ үлэһиттэрэ брелоктары оҥорорго уонна тааска уруһуйдуурга үөрэттиилэр.
Эбии үөрэхтээһин тэрилтэлэриттэн «Интегра», «Сайдыс», «Ант», «IQ –Школа», «Логос», «ISE», «Крафт», «Костюмер», «Учи.ру», «Фудлайф», «ПРОФ -Движение», «Темпл», «ILS_YKT», «Фокуспро», «Highfive», «Галилео», «Урдэл», «EasyGo», «IT- школа Алтан», «Wow_eng», «Кроль и Боевые панды», «Дьол», «Фантазия», «Интенсус», «Learn» кыттан, оҕолору сайыҥҥы лааҕырдарга ыҥырдылар.
Бэстибээл саамай чаҕылхай түгэнинэн “Фан-Аниме шоу» косплей күрэҕэ буолла.
