2014 сыллаахха ол кэминээҕи Ил Дархан Егор Борисов ыйааҕынан ахсынньы 5 күнэ Оҕо хамсааһынын күнүнэн биллэриллибитэ. Оҕо хамсааһынын уоттаах-төлөннөөх салайааччылара Александр Васильев, Геннадий Охлопков ыччат өрөспүүбүлүкэтээҕи түмсүүтэ сайдарыгар элбэх үлэни, тэрээһини ыытан, араас министиэристибэлэр, тэрилтэлэр салайааччыларын бу кэскиллээх дьыалаҕа кыттыһыннаран, түмпүттэрэ. Оҕо-ыччат сайдарын туһугар бүтүн өрөспүүбүлүкэни хамсатар элбэх үтүө өрүттээх мунньаҕы, семинары, төгүрүк остуолу, көрсүһүүнү, тэрээһини, сүлүөтү ыыппыттара.
2015 с. Президент Владимир Путин алтынньы ыйынааҕы Уурааҕынан Россия үрдүнэн “Российское движение школьников” оҕо хамсааһына тэриллэн, үлэ өссө күүһүрбүтэ. Салайааччынан Ньургуйаана Владимировна Макарова ананан, пионерскай тэрилтэ саҕаттан ыытыллар күргүөмнээх үлэни салҕааччытынан буолбута. Билигин РДШ 420 оскуола 130 тыһыынча оҕотун түмэр.
Оҕо хамсааһынын күнүн Дьокуускайга Бырабыытылыстыба дьиэтин киэҥ саалатын толору мустан бэлиэтээтилэр.
Оҕо хамсааһынын төрөөбүт күнүн ыалдьыттарынан үөрэх миниистирин эбээһинэһин толорооччу М.Ю.Присяжнай, Ыччат дьыалатыгар уонна социальнай коммуникация миниистирэ С.А.Саргыдаев, оҕо хамсааһынын бэтэрээннэрэ, эдэр лидердэр уонна активистар буоллулар.
Быйыл, Пионерия 95 сылын бэлиэтиир сылга, өрөспүүбүлүкэбит оҕо хамсааһына атын регионнарга холобур буолан, экология, спорт, сынньалаҥ, чөл олох, аһымал, патриоттуу иитии о.д.а. хайысхаларынан сайда турар.
Манна улахан оруолу түмсүү салайааччылара, учууталлар, уопсастыбаннас араас эйгэтин бэрэстэбиитэллэрэ ылаллар. Олохтоох салалта өттүттэн көмө, өйөбүл баар буолан, оҕолор уопсастыбаҕа буола турар тэрээһиннэргэ көхтөөх кыттыыны ылаллар.
Онон бүгүҥҥү үөрүүлээх күҥҥэ миниистирдэр Михаил Юрьевич Присяжнай, Степан Анатольевич Саргыдаев, пионер уонна оҕо хамсааһынын бэтэрээннэрин сэбиэтин бэрэссэдээтэлэ Нина Афанасьевна Барашкова улуус, нэһилиэк, оскуола бастыҥнарыгар анабыл наҕараадаларын туттардылар.
Россиятааҕы граннар куонкурустарын «Добро не уходит на каникулы» Россиятааҕы оҕо хамсааһынын «Добрый старт» номинацията — Намнааҕы гимназия,Чурапчы Хатылы, Хаҥалас Мохсоҕоллоох оскуолалара.
“Оҕо хамсааһынын өйүүр улуус (куорат) бастыҥ баһылыга” -Муома улууһун баһылыга И.П.Павлов.
“Оҕо хамсааһынын өйүүр нэһилиэк (куорат) бастыҥ баһылыга” — Ньурба улууһун баһылыга Е.М.Семенов.
“Оҕо хамсааһынын өйүүр оскуола бастыҥ дириэктэрэ” – Мэҥэ-Хаҥалас улууһун Павловскай оскуолатын дириэктэрэ В.В.Петров.
“РДШ бырагыраамаларын олоххо киллэриигэ үөрэх бастыҥ тэрилтэтэ”- Нам улууһун Хатыҥ-Арыы оскуолата (дириэктэр Д.И.Ноговицын).
“РДШ бырагыраамаларын олоххо киллэриигэ кылаас бастыҥ салайааччыта” – И.А.Винокурова, Ньурба 3 №-дээх оскуолата.
“Бастыҥ наставник” — пионер уонна оҕо хамсааһынын бэтэрээнэ Н.Д.Алексеева.
“Бастыҥ партнер” – Н.Е.Мординов-Амма-Аччыгыйын аатынан “Кэскил” оҕо бэчээтин кыһата (дириэктэр О.И.Семенова).
“Оҕо хамсааһынын бастыҥ педагог-тэрийээччитэ” –Г.А.Бессонова, Хаҥалас улууһун Мохсоҕоллоох оскуолата.
“Оҕо хамсааһынын бастыҥ лидерэ” – Саина Васильева, Ытык-Күөл лиссиэйин үөрэнээччитэ.
“Бастыҥ баһаатай” — Наталья Шубина, ХИФУ устудьуона, “ДАР” педэтэрээт чилиэнэ.
“Оҕо уопсастыбаннай тэрилтэтин бастыҥ координатора” — Н.П.Жорняк, Өлүөхүмэтээҕи Оҕо киинин эбии үөрэхтээһинин педагога.
“Дьулуур” оҕо уопсастыбаннай холбоһуктарын лидердэрин уонна активистарын түөскэ иилинэн бэлиэтинэн наҕараадаланнылар: өрөспүүбүлүкэтээҕи оҕо хамсааһынын сэбиэтин бэрэссэдээтэлэ Алина Пшенникова (Хаҥалас улууһун Покровскай 2 №-дээх оскуолата), Алиса Ладикова (Дьокуускай 23 №-дээх оск.), Ариан Собакин (Чурапчытааҕы гимназия), Алексей Сазонов (Павловскай, Мэҥэ-Хаҥалас), Алексей Никитин (Хатыҥ-Арыы,Нам), Дьулусхан Павлов (Мүрүтээҕи 1 №-дээх оск., Уус-Алдан) , Кира Пахомова (Ньурба 2 №-дээх оск.)
Бу күннэргэ “Сосновый бор” лааҕырга оҕо хамсааһынын лидердэрин уонна активистэрин симиэнэтэ буолла. Манна «Молодой лидер Якутии» уонна «Шаг вперед!» куонкурустар түмүктэринэн РДШ өрөспүүбүлүкэтээҕи сэбиэтин саҥа састааба талылынна. Онон саҥаттан саҥа ыччат оҕо хамсааһыныгар баһылыыр-кһүлүүр оруолу ылара, биһиги оҕолорбут олоххо көхтөөхтөрүн, уопсастыбаннай хамсааһынтан туора турбаттарын туоһулуур.
Бу үөрүүлээх күн, өрүү буоларын курдук, флеш-мобунан, үҥкүүнэн, ырыанан түмүктэннэ.
Ааптар: Таисия Алексеева