Ыам ыйын 11 күнүгэр саха тылын, литературатын учуутала Клара Борисовна Ксенофонтова көҕүлээһининэн, сылын ахсын ыытыллар, үтүө үгэскэ кубулуйбут «Ньургуһуннуун сиэттиһэн» диэн тэрээһиммит быйыл олус үчүгэйдик ааста.
Оҕо-аймах төрөппүттэрбитин, учууталларбытын кытта сарсыарда эрдэттэн айаннаан, Табаҕаҕа түмсэн, онтон оптуобус тохтобулуттан сатыылаан, чэбдик салгынынан толору тыынан, сымнаҕас сыа хаарга арыаллатан, эмиэ да сааскы сытыы тыалга үрдэрэн дьагдьайан, эмиэ да күн сандаарыччы тыгарыттан итииргээн, лыаҕы кытта сырсан, ньургуһуннардыын сибигинэһэн, Өлүөнэ эбэ хотуну өҥөйө сытар кэрэ көстүүлээх Табаҕа тумуһугар тиийэн кэлбиппит. Маннык айылҕаҕа тахсар үтүө үгэспитин Александр Константинович Чиряев мэлдьи көҕүлүүр уонна өйүүр. Сирбитин-уоппутун алҕаан, кылаастарынан түһүлгэлээн олорон аһаан бүтээппитин кытта, араас күрэхтэр ыытылыннылар.
Кылааһынан бары түһүмэхтэргэ көхтөөхтүк кытынныбыт. Ньургуһун оҥоһугун күрэҕэр төһө да кыһаллан оҥорон аҕалларбыт, миэстэҕэ тиксибэкккэ, ытыспытын сотуннубут. Ньургуһун туһунан хоһоон ааҕыы түһүмэҕэр уолаттарбыт бөлөҕүнэн ааҕан, II миэстэ буоллулар. Ньургун, Ньургууна, Ньургуһун диэн ааттаах дьон туһунан кэпсээһиҥҥэ кылааспыт спортсмена Тускун Тарабукин тустуук Ньургун Скрябин туһунан кэпсээн, II бочуотттаах миэстэни ылла. Хоһоон айыы күрэҕэр оҕолортон Айылхан Максимов (Айсен Захаров айбыт хоһоонун), төрөппүттэртэн Станислав Федоров эһэлэрэ айбыт хоһоонун ааҕаннар, эмиэ II миэстэ буоллулар. Онтон «Ньургуһуннуу нуоҕайан» үҥкүү күрэҕэр кыргыттар кыайыылаах таҕыстыбыт.
Ол кэннэ чэбдик салгыҥҥа оҕолор бары наһаа үчүгэйдик оонньоотубут-көрүлээтибит, сүүрдүбүт-көттүбүт. Бу тэрээһиммит сүрүн сыала-соруга тоҥ буору маҥнайгынан тобулар хорсун ньургуһуҥҥа кыратык да буоллар, холонон көрөөһүн буолар. Хас биирдии үөрэнээччи бэйэтин тургутан, 16 биэрэстэни уҥуордаан, мыраан үрдүгэр диэри сатыы хааман таҕыста. Бары тургутууну бары эрэллээхтик аастыбыт.
Бу эрэ түгэҥҥэ буолбакка, олохпут устата ньургуһун курдук хорсун, күүстээх санаалаах, кэрэ буоларга дьулуһуохпут!Камила Прудецкая, Дьокуускай куорат 12 №-дээх оскуолатын VII “В” кылааһын үөрэнээччитэ.
Жанна Леонтьева түһэриилэрэ.