Алтынньы 16 күнүгэр Нуучча тылын уонна литературатын нэдиэлэтин чэрчитинэн Ньурбатааҕы техническэй лиссиэйбит истиэнэлэрэ баал музыкатын доҕуһуолун тыаһынан уонна күлүүнэн-үөрүүнэн туолбуттара.
Александр Сергеевич Грибоедов 230 сылыгар аналлаах «Грибоедовскай баал» буолан ааста. Баалы 8 «б» кылаас үөрэнээччилэрэ полонез үҥкүүнэн арыйбыттара. Ол кэннэ атын кылаастар мазурка, котильон, падеграс, па де труа үҥкүүлэри туруорбуттара. Баалы выпускниктар вальсынан түмүктээбиттэрэ.
Баалбыт үҥкүүнэн эрэ муҥурдамматаҕа. Бырагыраамаҕа араас светскай уопсастыба болҕомтотун уурар оонньуулар, тэрээһиннэр ыытыллыбыттара. Үөрэнээччилэр араас викториналарга кыттан, сытыы өйдөрүн тургуппуттара.
10 «а» уонна 10 «б» кылаастар хас биирдии ыалдьыт ол кэминээҕи баал тыыныгар уйдарарыгар кыһаллан тэрийэн ыыттылар.
Үөрэнээччилэр баал туһунан бэйэлэрин санааларын маннык үллэһиннилэр.
Юля Саввинова, 11 «а» кылаас үөрэнээччитэ: — Баал тыына, ааттааҕын курдук, уус-уран тылга, кэрэҕэ, билиигэ олоҕурар. Ол үйэтээҕи дьон таҥаһын кэтэн, сырдык, киэҥ саалаҕа классическай муусука тыаһыгар вальс үҥкүүлээн уйдарбыппыт. Хас биирдиибит тутта-хапта сылдьыыта, мичээрэ, туспа эйгэни үөскэппитэ. Бу баал биһиэхэ умнуллубат түгэн буолбута, сырдыкка-кэрэҕэ кынаттаабыта. Ураты кэрэ уонна умсугутуулаах түгэн буолан ааста дии саныыбын.
Малена Винокурова, 11 «а» кылаас үөрэнээччитэ: — Литературнай баал олус умсугутуулаах, кэрэ түгэн буолбута! Бары олус кэрэтик таҥнан, ол үйэҕэ тиийбит курдук санаммыппыт. Маннык тэрээһиннэргэ оҕолор ордук бэйэ-бэйэлэрин кытта түмсэн, кыһаллан үҥкүү, постановка туруоран кыттыыны ылаллар. Дьону түмэр, киһи духуобунай өрүтүн сайыннарар-кэҥэтэр дьиҥнээх бырааһынньык буолан ааста.
Бу баал олус кэрэ, киэҥ хабааннаах тэрээһин буолар. Лицеистар олус сэмэйдик уонна көрсүөтүк кэпсэтэн, үҥкүүлэринэн уонна харах иминэн бэйэ-бэйэлэрин өйдөһөр курдук тутта-хапта сылдьыбыттара. Култуура уонна этикет сиэрэ-майгыта дьикти кэрэ эйгэни үөскэппитэ.
Оля ФЕЛЕГОНОВА, Ньурбатааҕы техническэй лиссиэй 11 «а» кылааһын үөрэнээччитэ.
keskil14.ru