Ньурба улууһугар олунньу 16-19 күннэригэр СӨ ситэриилээх былааһын отчуота бары нэһилиэктэргэ ыытылынна. Уопсайа отчуот мунньаҕар 1349 улуус олохтооҕо кытынна, ол иһиттэн Ньурба куоратыгар 257 киһи сырытта. СӨ Бырабыыталыстыбатын бэрэссэдээтэлэ Сергей Местников салайааччылаах 24 киһилээх оробуочай бөлөх үс күн устата улуус олохтоохторун кытары көрүстүлэр.
Олунньу 19 күнүгэр «Кыталык» култуура дьиэтигэр Ньурба куорат олохтоохторун иннилэригэр отчуот ыытылынна. Маҥнай олохтоохторго СӨ Бырабыыталыстыбатын наҕараадаларын үөрүүлээх туттарыы сиэрэ-туома ааста.
Бэлиэтэммиттэр өрөспүүбүлүкэ сүрүн салааларын сайдыытыгар сүдү кылааты киллэрбит үтүөлэрин иһин наҕараадалары туттулар:
Иванов Геннадий Игнатьевич – СӨ эти-хааны сайыннарыыга уонна успуорка улахан кылаатын иһин Бочуоттаах грамота.
Федотов Алексей Дмитриевич – өрөспүүбүлүкэ социальнай-экэнэмиичэскэй сайдыытыгар кылаатын иһин, ону тэҥэ Арассыыйаҕа сири оҥорооччу сулууспа тэриллибитэ 260 сылыгар анаммыт бэлиэнэн наҕараада.
Можуков Прокопий Николаевич – сири оҥоруу тиһигэр элбэх сыллаах үтүө суобастаах үлэтин уонна идэтин ситиһиилэрин иһин наҕараада.
Лебедева Мария Степановна – нэһилиэнньэ доруобуйатын харыстабылыгар үтүөлэрин иһин «Саха Өрөспүүбүлүкэтин доруобуйа харыстабылын туйгуна» наҕараада.
Бырабыыталыстыбаны кытта көрсүһүү кэмигэр олохтоохтор кыһалҕалаах ыйытыылары туруордулар:
- үөрэх эйгэтин тэрилтэлэригэр ыстааттаах расписание чопчулааһына;
- хаарбах дьиэлэртэн көһөрүүнү тэрийии;
- АБДь дьиэ кэргэттэригэр өйөбүл миэрэлэрэ;
- уот тарыыбын оҥоруу;
- тыа хаһаайыстыбатын сайдыытын кыһалҕалара уонна инники кэскилэ;
- доруобуйа харыстабылын эбийиэктэрин тутуутун хаамыыта.
Биһиги улууспутугар Спорт сыла биллэриллибитинэн, маны таһынан 2027 сылга улууспутугар СӨ норуоттарын IX Спортивнай оонньуулара ыытылларынан, СӨ физическэй култуураҕа уонна успуорка миниистирин бастакы солбуйааччыта Гаврил Михайлович Мохначевскайы уонна ыраах нэһилиэктэргэ диагностика уонна диспансеризация бырагыраамаларын кэҥэтии былааннарын туһунан СӨ доруобуйа харыстабылын миниистирин солбуйааччыта Татьяна Юрьевна Павлованы кытары кэпсэттибит.
Татьяна Павлова улахан дьоҥҥо, оҕолорго, дьахталларга уонна эр дьоҥҥо аналлаах диспансеризация бырагыраамалара сыл аайы ыытыллалларын иһитиннэрдэ. Ону таһынан, диспансеризацияны тэрийэргэ передвижной мобильнай комплекстарынан хааччыйыы үлэтэ барар диэн эттэ. Быйыл «Дьиэ кэргэн» национальнай бырайыак чэрчитинэн передвижной мэдиссиинэ комплексын ылыы былааннанар. Маны сэргэ, өрөспүүбүлүкэтээҕи мобильнай биригээдэлэр кииннэрэ ыраах нэһилиэнньэлээх пууннары кэрийэн диагностикалыылларын иһитиннэрдэ.
Ньурба куорат олохтоохторо СӨ ситэриилээх былааһын отчуотун сөбүнэн ааҕан, биһирииллэрин биллэрдилэр.
Мунньахха сырыттылар Малена Винокурова, Юлия Саввинова Ньурбатааҕы техническэй лицей 11 «а» кылааһын үөрэнээччилэрэ, «Объектив» медиакиин эдкордара.
Кэскил14.ру