Бу күннэргэ Петропавловск-Камчатскай куоракка В. Фатьянов аатынан биатлон комплексыгар Уһук Илиҥҥи федеральнай уокуруктааҕы биатлоҥҥа чемпионат буолан ааста. Манна Саха сирин кыыһа, «Алдан» олимпийскай эрэллэр спорт оскуолатын иитиллээччитэ, билигин Уфа куоракка физкультура колледжыгар 3 кууруска үөрэнэр Августина Иванова 10 км сүүрүүгэ уонна 6 км сприҥҥэ кыайан кыһыл көмүс мэтээллэри ылла!
Бүгүн Августина Камчаткаттан Уфа куоракка сборга көтөөрү олорор. Биһиги ыйытыыларбытыгар спортсмен кыыс бэрт холкутук сөбүлэһэн эппиэттээтэ.
Августина бэйэтэ Ньурба улууһун Антоновкатыттан сылдьар. Алдаҥҥа спортивнай эрэллэри бэлэмниир спорт оскуолатын бүтэрэн, билигин Башкорстаҥҥа Уфа куоракка физическай культура, управление уонна сервис Стерлитамакскай кэллиэһигэр 3 кууруска үөрэнэр.
— Дьиэ кэргэним туһунан кэпсиир буоллахпына, биэспит, эдьиийдээхпин уонна кыра бырааттаахпын. Аҕам Артем Николаевич МЧС сулууспатыгар үлэлиир, ийэм Ирина Александровна уһуйаан иитээччитэ. Антоновка оскуолатыгар 6-с кылааска диэри үөрэммитим, ол кэнниттэн Алдан куоратыгар көспүтүм.
— Алдаҥҥа хайдах тиийэн хааллыҥ? Ол туһунан кэпсээ.
— Аан бастаан Алдаҥҥа 2017 сыл сайыныныгар бастакы тренербын Осипов Петр Аркадьевиһы кытары сылдьыбыппыт. Ол кэннэ салгыы дьарыктанан саҕалаан, 2018 сыллаахха сайын Алдаҥҥа сбордана тиийбиппит уонна ити сүүмэрдээһин кэннэ миигин спорт оскуолаҕа ылбыттара, интернакка олоро киирбитим. Бастаан хайыһарынан сүүрүүнэн дьарыктанар этим, онтон 2020 с. кулун тутар ыйга Уфаҕа биатлоҥҥа «Азия оҕолоро» кыһыҥҥы оонньууларыгар бэлэмнэнэ барбытым, ол эрээри ковид хамсыга туран, онно төттөрү дойдубар кэлбитим. Ити сыл атырдьах ыйыгар тренерим Петр Аркадьевич «Уфаҕа сбордана көтөҕүн» диэн эрийэн эппитэ, ол онтон ыла биатлонунан күүскэ дьаныһан туран дьарыктанан барбытым.
— Билиҥҥи күрэхтэһииҥ туһунан кэпсээ. Кыайыыны хайдах ситистиҥ?
— Биатлоҥҥа ытыы барытын биллэрэр, ытыыҥ үчүгэй буоллаҕына, түмүгүҥ эмиэ үчүгэй буолар, онтон ытыыҥ куһаҕан буоллаҕына, арыый мөлтөх түмүгү көрдөрөҕүн. Ол эрэн үчүгэйдик атаххынан сүүрэр уонна үчүгэйдик ытар буоллаххына, нууччалыы эттэххэ, «И ты будешь в дамках». Утарылаһааччыларым Камчаткаттан, Сахалинтан уонна Забайкальскайтан этилэр.
— Эрдэ ханнык күрэхтэһиилэргэ кыттыбыккыный? Туох ситиһиилээххиний онно?
— 2022 сыллаахха Сахалиҥҥа Уһук Илин уокурук чемпионатыгар кыайбытым. 2023 сыллаахха Арассыыйаҕа ыччат спартакиадатыгар буккаас эстафетаҕа хамаанданан 3 миэстэ буолбуппут.
— Бу сотору ханнык күрэхтэһиилэргэ кыттаары сылдьаҕын?
— Бу сотору, олунньу ыйга, Саранск куоракка Россия первенствота буолар, онтон кулун тутарга Чайковскайга эмиэ первенствоҕа кыттыыны ылабын.
— Түмүккэ, эдэр спортсменнарга тугу тиэрдиэҥ этэй?
— Оҕо хаһан баҕарар бэйэтэ баҕаран туран дьарыктаныахтаах, бэйэтэ баҕарбат буоллаҕына, эн кинини хайдах да күһэйбэккин. Онон хас биирдии спортсмеҥҥа баҕа санаа, сыал-сорук диэн баар буолуохтаах. Ол ону ситиһэргэ дьулуһуохтаахпыт.
keskil14.ru