Ньурба куората улууспут киинэ буолар. Ньурба улууһугар барыта холбоон 24 тыһыынчаттан тахса киһи олорор. Онтон олохтоохтортон 10 тыһыынча кэриҥэ киһи Ньурба куоратыгар олорор.
Куораппыт сайдарыгар, тупсаҕай көстүүлээх буоларыгар төһө үп-харчы наадатын билээри Ньурба куорат олохтоох салайыныы баһылыгын социальнай боппуруостарга солбуйааччыта Семёнова Изамира Федосьевнаҕа сырыттым уонна куораппыт бүдьүөтүн туһунан элбэҕи биллим.
— Изамира Федосьевна, куорат бүдьүөтэ диэн тугуй, кини Ньурба куораппытыгар хайдах тэриллэрий?
— Бүдьүөт диэн икки чаастан турар, дохуот киирэр уонна ороскуоттуур чаастарыттан. Ньурбабыт бүдьүөтүн үп киириитин уонна ороскуоттуур чаастарын, араас былааннаммыт тосхоллорунан тыырааhынын Ньурбабыт куоратыгар талыллыбыт дьокутааттар бигэргэтэллэр. Бигэргэммит бүдьүөтүнэн олохтоох салайыныы үлэлиир. Бүдьүөт дохуота, хас биирдии үлэлээх олохтоох төлөөбүт нолуоктарыттан уонна нолуокка сыһыана суох төлөбүрдэртэн киирбит үптэн үөскүүр.
— Ньурба бүдьүөтүгэр туох сүрүн ыстатыйалар баалларый? Үп- харчы туохха ордук ороскуоттанарый?
— Дьокутааттар бигэргэппит бүдьүөттэринэн тосхоллорго былааннаммыт үлэлэр олоххо киирэн бараллар. Ньурбабыт куоратын бүдьүөтэ 204 мөл. кэриҥэ солкуобай буолар. Бу харчыны ороскуоттуурга 16 араас тосхол үлэлиир. Олортон сүрүннэрэ куораппыт ыраас тупсаҕай буоларыгар туһуламмыт тосхол буолар.
— Куорат бүдьүөтүгэр туох эбии дохуот баарый?
— Хамсаабат баайы туһаныы төлөбүрэ, төлөбүрдээх өҥөлөрү оҥорууттан, куорат бас билиитигэр баар тэрилтэлэр барыстара, соболоҥо суох босхо харчы киириитэ, ыстырааптар уо.д.а. бүдьүөккэ эбии дохуот буолаллар.
— Олохтоохтор куорат бүдьүөтэ туһанылларын хайдах билиэхтэрин сөбүй? Бу инфрмацияны ханна булуохха сөбүй?
— Сыл ахсын Ньурба куоратын баhылыга Игнатьев Геннадий Васильевич отчуоттуур уонна анаммыт Ньурба куоратын анал саайтыгар информация барыта тахсар.
— Ньурбаҕа ханнык бырайыактар эбэтэр көҕүлээһиннэр куорат бүдьүөтүттэн үбүлэнэллэрий уонна куорат олохторугар хайдах дьайалларый?
— Норуот көҕүлээhинин олоххо киллэрэр тосхол, ол эбэтэр ППМИ тосхоло буолар. Бу тосхол олоххо киирэригэр хас биирдии түөлбэ олохтооҕо итэҕэйэн үп хомуйан кыттыhар кыахтаах. Хас биирдиибит олоҕо тупсарыгар туһуламмыт тосхоллор олоххо киирэллэрэ олус кэрэхсэбиллээх.
— Ньурба куорат бүдьүөтүгэр үөрэххэ уонна ыччат политикатыгар үп-харчы көрүллэр дуо?
— Yөрэххэ уонна ыччат политикатыгар уонна успуортка анаммыт тосхолго кэминэн үп көрүллэр, тосхол иһинэн араас тэрээһиннэр былааҥҥа киирэллэр. Ити үп былааннаммыт тэрээһиннэри ыытарга, атын улуустарга, куораттарга эдэр ыччат кыттарыгар кыах биэрэр курдук кэлэр-барар айаннарын толуйарга, бириис ыларга туттуллар.
Изамира Федосьевнаны кытары кэпсэтэн, куоратым туһунан үгүһү биллим, мин санаабар төрөөбүт нэһилиэкпит, куораппыт, улууспут сайдарын, тупсарын туһугар хас биирдии киһи кыһаллыахтаах.
Диана Иванова, Ньурбатааҕы техническэй лиссиэй 7 «А»кылааһын үөрэнээччитэ,
«Объектив» медиакиин юнкора.
keskil14.ru