Ньурба оройуонугар балаҕан ыйын 10-11 күннэригэр үөрэх эйгэтин үлэһиттэригэр аналлаах мунньах буолан ааста.
Түмүктүүр тэрээһининэн медиакииннэр эдэр кэрэспэдьиэннэрэ улууспут үөрэҕирии салалтатын салайааччытын Федор Федорович Ушкановы кытары утары көрсөн олорон «Тэҥнээхтэр кэпсэтиилэрэ» («Разговор на равных») буолла. Кэпсэтии «Патриот буолуу дьыалатыгар» диэн тиэмэ тула ыытылынна. Оҕолор ыйытыылары, этиилэри бэлэмнээн кэлэн олус сэргэхтик үлэлэстилэр. Салайааччы Федор Федоровичка тус ыйытыылары да биэрдилэр. Патриот буолуу диэн тугуй, диэн ыйытыыга кини: «Дойдуга таптал уонна ону туоһулуур дьыалалар» диэн хоруйдаата.
Салгыы оскуолаларга оҕолор дойдуга туһалаах уонна суолталаах дьыалаларынан дьарыктаналлара көһүннэ. Ол курдук Кыайыы 80 сылын көрсө араас тэрээһиннэри былааннаан ыытаары сылдьалларын эттилэр. Анал байыннай дьайыыга сылдьар дьонноругар көмөҕө араас тэриллэри оҥорон ыыталларын кэпсээтилэр.
Ити курдук биир киэһэ Ньурбаҕа медиакииннэр оҕолоро уонна салайааччылара атах тэпсэн олорон тэҥнээхтик кэпсэттилэр.
«Ыллык» эдкорпост, Ньурба, Хаҥалас.