Хас биирдии киһи туруктаах буолуоҕун, байылыаттык олоруоҕун баҕарар. Ол араас кэккэ экэнэмиичэскэй биричиинэнэн ыарахаттардаах буолар. Бу маны учуоттаан туран, биһиги оройуоммут салалтата толкуйдаан, ырыҥалаан көрөн баран, Алроса хампаанньаттан киирэр дивидены норуокка туһалаатын диэн бу тэрээһини тэрийэргэ санаммыттара. Онон Ньурба оройуонугар 2022 сыл Норуот көҕүлээһинин өйөөһүн сыла буолла.
Бу бырайыак олус наадалааҕын, туһалааҕын көрдөрдө. Дьон өйө-санаата көтөҕүллэн элбэх араас дьыалаларга ылыстылар. Ол курдук мөлүйүөнүнэн суумманы тыыран, бырайыак суруйбут дьоннорго грант быһыытынан биэртэлээтилэр. Билигин биһиги оройуоммутугар бэйэ дьарыктаах дьон үксээтэ. Араас өҥөнү, бородууксуйаны оҥорооччулар элбээтилэр. Ол быыһыгар, оскуолалар бырайыактарын эмиэ өйөөтүлэр. Бу олус хайҕаллаах уонна махталлаах саҕалааһын буолар. Биһиги оройуоммут баһылыга Алексей Михайлович Иннокентьев бу үтүө дьыаланы саҕалаан дьон өйүн-санаатын өрө көтөхтө уонна уһугуннарда.
Биһиги Хаҥаласпыт оскуолатыттан икки бырайыак өйөннө. Ол курдук «Начинающий фермер» куонкуруска бастаабыт «Мини цех по производству пельменей» уонна «Медиа кружок» диэн бырайыактар. Бу балары иккиэннэрин оҕолор саҕалаабыт бырайыактара буолаллар. Билигин пельменнай сыахпытын эбии дьарык быһыытынан үлэтин саҕалаан эрэбит. Онтон медиа куруһуокпут биһиэнэ уруккуттан үлэлии турар («Ыллык» эдкорпост). Баһылыкпыт үөрэнээччилэри кытары көрсүһүүтүгэр, мин бэйэбит «Ыллык» эдкорпоспут туһунан сырдаппыппар, Алексей Михайлович бэйэтэ көҕүлээн, бырайыак суруйан аппаратурата ылыҥ диэн эппитэ. Онон билигин видео өттүн баһылыырбытыгар сөптөөх тэрил ылан олоробут.
Хаҥаласпыт нэһилиэгэ өрүү саҥаны өйүүр, идиэйэлээх нэһилиэк буолааччы. Онон даҕаны биһигиттэн саамай элбэх бырайыак өйөммүт, олоххо киирбит. Ол курдук көтөрү иитээччи, туойунан үлэлэр, тыа хаһаайыстыбатыгар хас да бырайыак, эт эрбэтии, тротуарнай плита оҥоруу, уустарбыт, Сатаҕа турбазабыт, парикмахерскай өҥө оҥоруу уо.д.а. наадалаах бырайыактар.
Бу ааспыт нэдиэлэҕэ бу сылбыт түмүктэнэр тэрээһинэ буолан ааста. Саҥа Ньурба тыйаатырын дьиэтигэр бэйэ дьарыктаах дьоҥҥо, урбаанньыттарга Focus PPO тэрилтэ үөрэх ыытта. Кыталык култуура уораҕайыгар саҥа тахсан эрэ дьыалалар быыстапкалара буолла. Манна биһиги оскуоланан киирэн пелмень амсатыытын оҥордубут уонна мин сэҥээрбит дьоҥҥо эдкорпоспут туһунан сырдаттым. Онтон дьэ сылбытын үөрүүлээх сабыы тэрээһинэ буолла. Манна саҥа дьыалаларын үчүгэйдик ылсыбыт бырайыактарга наҕараада биэртэлээтилэр, бэлиэ туттартаатылар. Онно миэхэ эмиэ бэлиэ биэрбиттэриттэн мин олус үөрдүм уонна долгуйдум. Дойдубут сайдарын туһугар дьон бары кыһаллан туруулаһан үлэлиэ, кылаатын киллэриэ дии саныыбын.
Анжелина Жданова, «Ыллык» эдкорпост, Хаҥалас, Ньурба.