Олунньу 27 күнүгэр Ньурба оройуонун көһө сылдьар драматическай тыйаатырыгар «Мүчүк-2024» оскуола оҕолорун театральнай кэллэктииптэрин көрүү-күрэҕэ буолан ааста. Маар нэһилиэгиттэн «Дьикти Саас» драмтеатр куруһуогун оҕолоро «Ойуур оскуолата» Николай Якутскай суруйуутунан остуоруйаны көрдөрдүбүт уонна улахан бөлөххө маҥнайгы миэстэни ыллыбыт!
Көрүү-күрэххэ барыта 21 кэллэктиип, 100-тэн тахса оҕо, 20 салайааччы кыттыыны ылла. Бу күрэххэ кэллэктииптэри икки бөлөххө арааран күн устата көрдүлэр.
Маар орто оскуолатын «Дьикти саас» драмтеатр куруһуогун оҕолоро бу күрэххэ биир ыйы быһа бэлэмнэммиппит. Нэһилиэкпит «Алгыс» норуот айымньытын киинэ көмө буоллуллар: музыканы таҥан, күнүн аайы сыанаҕа бэлэмнэнэн, сценическай таҥас төрөппүттэрбит тиктэрэн, түмүккэ II бөлөххө 1 миэстэни ылан сыалбытын ситистибит. Онтон Маар орто оскуолатын 1 кылааһын үөрэнээччитэ Оскар Алексеев мэник куобах оруолун оонньоон «Бастыҥ уол оҕо оруола» анал аат хаһаайына буолла!
Бары оскуола тыйаатырдара олус бэлэмнэммиттэр: декорациялара, реквизиттара, таҥастара-саптара оонньуур айымньыларын киэргэттэ. Талааннаах оҕо наһаа элбэх эбит.
Түмүккэ, I бөлөххө (алын сүһүөх):
1 миэстэ — Чуукаар орто оскуолата, П. Ойуунускай «Көтөрдөр мунньахтара»,
2 миэстэ — 3 нүөмэрдээх Ньурба алын сүһүөх оскуолата Н. Якутскай «Ойуур оскуолата»,
3 миэстэ — Өҥөлдьө орто оскуолата Н. Якутскай «Ойуур оскуолата».
II бөлөххө (улахан бөлөх):
1 миэстэ — «Дьикти Саас» Маар орто оскуолатын театральнай коллектива.
2 миэстэ — Маалыкай орто оскуолата, Далан «Үрэх баһын үһүйээннэрэ»,
3 миэстэ — Ньурбатааҕы элбэх хайысхалаах гимназия, Н. Якутскай «Көрдөөх булчуттар».
Антоновка орто оскуолата Платон Ойуунускай «100 сыллаах былаан» испэктээк Гран-при үрдүк аатын ылла.
Бу тэрээһиҥҥэ кыттаммыт сыанаҕа тутта-хапта сылдьыы култууратын, декорацияны, атрибуттары, уоту-күөһү, тыаһы-ууһу табыгастаахтык туттары биллибит. Күрэххэ кытыннарбыт, бэлэмнээбит тыйаатырбыт салайааччытыгар Саргылана Петровнаҕа махталбытын биллэрэбит. Бары кыттыбыт коллективтарга, тэрийээччилэргэ уонна Ньурбатааҕы көһө сылдьар драмтеатр үлэһиттэригэр махтанабыт.
Камелия ЯКОВЛЕВА, «Юла» медиакиин эдкора, Маар орто оскуолата, Ньурба.