Ньурба куоратыгар алтынньы 9 күнүгэр Николай Чуор аатынан «Кыталык» култуура дыбарыаһыгар, РФ дьиэ кэргэн сылыгар, СӨ оҕо саас сылыгар, Ньурба оройуона (Марха улууһа) төрүттэммитэ 200 сылыгар аналлаах, биһиги биир дойдулаахпыт Таркаайы олохтооҕо норуот ырыаһыта, чабырҕахсыт, олоҥхоһут, тойуксут, оһуокайдьыт Семен Степанович Егоров-Оһоохой Сэмэн «Күн Тэгиэримэн бухатыыр» олоҥхотун туруорарга оруолларга талыы буолла.
Бу суолталаах тэрээһини Ньурба оройуонун култууратын салалтата иилиир-саҕалыыр. Былырыын 2023 сыллаахха биһиги Хаҥаласпыт киһитэ Спиридон Васильевич Петров-Чыычаах «Оҕо Дьулаах бухатыыр» олоҥхото туруоруллубута.
Онон «Күн Тэгиэримэн бухатыыр» олоҥхону туруорарга оруолларга 7-17 саастаах оҕолорго талыы-кастинг буолла.
Тойук, ырыа, хоһоон, үҥкүү арааһа дьиэрэйдэ, көрүлүннэ. Оҕолор бары да олус талааннаах эбиттэр. Бу буолан ааспыт кастинга мин эмиэ кытынным. 60-тан тахса оҕо кытынна. Мин бэйэм үгэ аахтым, ыллаатым, үҥкүүлээн көрдөрдүм уонна биэрбит сорудахтары толордум. Долгутуулаах этэ, ол эрэн дьүүллүүр сүбэ кыттыылаахтара өйөбүл буоллулар. Үчүгэйдик кыттыыны ыллым, сөбүлээтим.
Түмүгүн иллэрээ күн биллэрдилэр: мин 29 оҕо иһигэр киирэн оруолу ыллым. Бу маннык суолталаах, үйэлээх тэрээһиҥҥэ кыаттарбыттан олус үөрэбин уонна долгуйабын.
Татьяна Иванова, «Ыллык» пост, Хаҥалас, Ньурба.
keskil14.ru