Ньурбаҕа атырдьах ыйын 16-17 күннэригэр «Түмэр түгэн» ыччат бэстибээлин чэрчитинэн сэттис төгүлүн ыытыллар «Долина 2028» өрөспүүбүлүкэ эдэр учууталларын форума ыытылынна. Биир бэйэм маннык түгэни мүччү туппакка, кыттааччылартан уонна тэрийээччилэртэн аҕыйах хоруй ыллым.
Ирина Сергеевна Бурцева, эдэр ыччат ассоциациятын наставнига, Дьокуускай куоракка 39 нүөмэрдээх оскуолаҕа завуч, учуутал, форум тэрийээччитэ:
— «Түмэр Түгэн» фестиваль иһинэн биһиэхэ, эдэр учууталларга, «Образование» диэн былаһаакка биэрбиттэрэ. Бэйэбит, эдэр ыччат, сыл аайы ыытар «Долина 2028» диэн форумнаахпыт, онон 16 оройуонтан эдэр ыччаты илдьэ кэллибит. Манна кэлэн учууталлар үөрэнэллэр, тирээн турар боппуруостары быһаарсаллар. Үөрэх хаачыстыбатын үрдэтэргэ үлэлииллэр. Бастакы күн 12 былаһаакканан 80 эдэр учууталлары, иитээччилэри, СПО преподавателлэрин түмэн үлэлэстибит. Иккис күн бэстибээл иһинэн бырайыактарынан үлэ буолла. «Ньурба оройуонун сайдыыта» диэн үөрэх өттүн көрөммүт, хайдах үөрэҕи сайыннарарбытын быһаарыстыбыт, хамаанданан үлэлээн үс улахан бырайыак оҥордубут.
Елена Александровна Николаева, Бүлүүтээҕи үһүс нүөмэрдээх оскуолаҕа инновационнай-методическай өттүнэн директоры солбуйааччы.
— Елена Александровна, туох санааттан бэстибээлгэ кэллигит?
— Элбэх үөлээннээхтэрбин кытта билсээри, үлэбэр туһалааҕы, саҥаны билээри кэлбитим.
— «Түмэр Түгэн» ыччат бэстибээлигэр тугу ордордугут?
— Биһиги былаһааккабытыгар маастар-кылаастар буолбуттара, ону ордордум. Ил Дархаммытын Айсен Сергеевич Николаевы кытта көрсөн үөрдүм. Эдэр ыччат бэстибээлэ буолан киэһээҥҥи өттүгэр олус үчүгэй бырагыраамалаах эбит. Ньурбаҕа бастакытын сылдьабын, үчүгэй дьонноох-сэргэлээх эбит, тэрээһини үрдүк таһымнаахтык ыыттылар.
Лия Степановна Заморщикова, Сунтаардааҕы бастакы нүөмэрдээх оскуолаҕа алын кылаас учуутала.
— Үлэлээбитим үһүс сыла буолла, Сунтаартан бастакыбытын кэлэ сылдьабыт, сэттиэбит.
— Тэрээһин эдэр учууталларга тугу биэрэрий?
— Элбэх билиини, уопуту, билсиини-көрсүүнү биэрэр. Учуталлар балаҕан ыйын маҥнайгы күнүттэн үлэбитигэр тахсаары сылдьабыт. Онон үлэ иннинэ тэрээһини ыыппыттара олус үчүгэй.
— Бэстибээлгэ кэлбит кыттааччыларга баҕа санааҕыт.
— Ыччаттарга, үөлээннээхтэрбэр инникитин сайда турдуннар, тэрээһин элбии турдун. Маннык бэстибээллэр баалларын тухары биһиги сайдабыт, дьоллонобут.
Бэлэмнээтэ Анжелина ЖДАНОВА, Х кылаас.
Хаҥалас, Ньурба.
«Ыллык» эдкорпост.