Быйыл кылааһынан, учууталбыт Наталья Михайловна Максимова уонна төрөппүттэр буолан, Алматы куоракка норуоттар икки ардыларынааҕы фестивальга айаннаабыппыт. Новосибирскай куоракка пересадка быыһыгар куоракка тахсан күүлэйдээтибит. Бастаан экскурсияҕа бардыбыт, онно биһигини улахан автобус көрүстэ. Гид наһаа интэриэһинэйдик кэпсээбитэ.
Змей Горынычка уонна Кощей Бессмертнайга анаммыт пааматынньык аттыгар хаартыскаҕа түспүппүт. Үс төбөлөөх, аттыгар көмүс сундуук турара уонна тула балыктар бааллара.
Оптуобуспутугар олорон, аһыыр сиргэ барбыппыт, чэйдээн баран «Күн» мусуойугар сырыттыбыт. Саамай интэриэһиргээбитим диэн – хамаандаҕа арахсан «квест» оонньообуппут. Сорудаҕа – аттары уонна сымыыттары мусуой иһиттэн булааһын. Мин хамаандам бастаабыта. Наһаа үөрдүбүт, онуоха чупа-чупс бириис биэрбиттэрэ. «Күн» мусуойа элбэх хостоох эбит. Араас барыта баар, оннооҕор, сахалыы хос баар эбит. Онно төрүт киэргэллэр, симэхтэр уонна оҥоһуктар көрдөрүүгэ тураллар.
«Күн» мусуойуттан бүтэн баран, Г.А. Шило аатынан зоопаркаҕа айаннаатыбыт. Россияҕа биир саамай улахан зоопаркаларыттан биирдэстэрэ эбит. Кыыл арааһа баар. Мин саамай сөбүлээн көрбүт кыылларым баабыр, хахай, эбисийээнэ, макака.
Новосибирскай сөрүүн куорат эбит. Кэммитин наһаа үчүгэйдик, туһалаахтык атаардыбыт.
Сандаара Степанова,
А.Г. уонна Н.К. Чирээйэптэр ааттарынан Дьокуускай куорат
национальнай гимназиятын
III «А» кылааһын үөрэнээччитэ.