Дьоллоох Дьокуускай куораппыт олоҕо бу күннэргэ оргуйан олорор. Араас хабааннаах тэрээһиннэр күннэтэ ыытыллаллар. Ол курдук бэс ыйын 27-28 күннэригэр норуоттар икки ардыларынааҕы «Книжный ветер» быыстапка-дьаарбаҥка ыытылынна. Манна Арассыыйа араас регионнарыттан бэчээт кыһалара кытыннылар.
Элла Иванова, «STARBOOKS» кинигэ маҕаһыына:
– Оҕолорго да, улахан дьоҥҥо да араас кинигэлэри билиһиннэрэр, ааҕыыны көҕүлүүр сыаллаах бу быыстапкаҕа кытта сылдьабыт. Биһиги кинигэбит маҕаһыыныгар саҥаттан саҥа кинигэ таҕыста да, тута аҕалан ааҕааччыларбытын үөрдэбит. Мин санаабар, ааҕар оҕо да, улахан да дьон элбэх.
Ксения Киселева, Москватааҕы «КАРЬЕРА-ПРЕСС» издательство:
– Быыстапкаҕа тылбаас литературата, дьон сэргээн, көрдөөн ааҕар бастыҥ топовой кинигэлэрэ туруорулуннулар. Оҕо, ыччат сөбүлээн ааҕар литератураларын, араас научнай-популярнай уонна уус-уран кинигэлэри аҕаллыбыт. Атын кинигэ, бэчээт кыһаларын кытта билсиһэр, бэйэбит таһаарар кинигэлэрбитин киэҥ араҥаҕа тарҕатар сыаллаах кыттабыт. Саха сирин дьоно кинигэни ааҕаллар, наһаа интэриэстээхтэр эбит диэн үөрдүбүт.
Александра Жиркова, Москватааҕы «РИФМОГРАД» издательство:
– Ааҕыыны көҕүлүүр сыаллаах хоһооннор хомуурунньуктарын билиһиннэрэ кэллибит. Аныгы олох сиэринэн «Вконтакте» социальнай ситимҥэ ааҕааччыларбытын кытта алтыһар анал бөлөхтөөхпүт. Ханнык да кэмҥэ, хайдах да олоххо дьон-сэргэ кинигэ ааҕарын сөбүлүүр.
Светлана Гуляева сиэнин Милананы кытта, Дьокуускай куорат олохтооҕо:
– Олус үчүгэй тэрээһин буола турар, араас маастар-кылаастарга сырыттыбыт. Сиэним нуучча тыллаах оскуолаҕа үөрэнэр буолан, нууччалыы литератураны көрдүбүт. Оҕоҕо ааҕыыга тапталы улахан дьон бэйэбит холобурбутунан иҥэриэхтээхпит. Ааҕар оҕо сөпкө суруйар, толкуйдуур, ырыҥалыыр кыаҕа тобуллар.
Мичийэ Платонова, Милана Корякина, VII кылаас,
«Айыы Кыһата» Национальнай гимназия, Дьокуускай к.
Арсений Портнягин, VIII кылаас,
Дьокуускай куорат 17 №-дээх орто оскуолата,
«Кэскил» оҕо бэчээтиин кыһатын, «IT-cube» цифровой үөрэхтээһин киинин
«МедиаПРО. Спорт» куурус юнкордара