Быйыл балаҕан ыйыгар Хайахсыт нэһилиэгин олохтоохторо баһылыгы талан быыбардаабыттара. Быыбар түмүгүнэн, нэһилиэкпит баһылыгынан Тарас Лукич Тарасов-Тускул норуот итэҕэлин ылан, иккис төгүлүн баһылыгынан талыллыбыта.
Алтынньы 18 күнүгэр нэһилиэкпит баһылыга Тарас Лукич Тарасов дуоһунаһыгар киирэр инаугурацията буолан ааста.
Тэрээһин Иннокентий Гурьевич Тимофеев-Теплоухов аатынан «Алаһа» сынньалаҥ киинигэр ыытылынна. Тэрээһин оскуолабыт байыаннай-патриотическай кулуубун иитиллээччилэрэ государственнай бэлиэлэрин – Арассыыйа уонна Саха өрөспүүбүлүкэтин былаахтарын тутан киллэриилэринэн саҕаланна.
Бу күн нэһилиэк тэрилтэлэрэ, олохтоохторо, өр сылларга бииргэ үлэлэспит дьоно үтүө тылларын, баҕа санааларын эттилэр.
Оскуолабыт «Уолан ааҕыыларын» иитиллээччилэрэ поэт, тылбаасчыт, саха норуотун биир чулуу государственнай деятелэ, Саха өрөспүүбүлүкэтин Ил Түмэн Государственнай Мунньаҕын бастакы бэрэссэдээтэлэ Афанасий Петрович Илларионов хоһооннорун аахтылар, нэһилиэк олохтоохторо бэйэлэрин эҕэрдэ нүөмэрдэрин көрдөрдүлэр.
Бу күн нэһилиэк сайдарын туһугар кылааттарын киллэрбит олохтоохтору наҕараадалааһын буолла. Иккис төгүлүн нэһилиэк баһылыгын чэпчэкитэ суох дуоһунаһыгар талыллыбыт Тарас Лукич Тарасовы истиҥник эҕэрдэлиибит.
Вадим КОЛЕСОВ, XI кылаас,
А.П. Илларионов аатынан Хайахсыт орто оскуолата, Чурапчы