Instagram, YouTube ситимигэр сахалыы тыллаах биэрии тэтимнээхтик сайдар, болҕомтону тардар. Николай Корякин @nikolayate блогер, төрөөбүт тылынан камера иннигэр киинэни ырытар, санаатын сатаан тиэрдэр. Киинэ эйгэтигэр элбэҕи билэр-көрөр. Билигин Интэриниэт ситимигэр сахалыы тыл-өс, биэрии сайдара, сахалыы эйгэ кэҥиирэ олус наада. Оҕолорго, ыччакка аналлаах биэрии балачча баар, онтон киһи үөрэр.
Коля бу кэми мүлчү туппакка, барыны-бары билэ-көрө сатыыр, көрөөччү интэриэһин учуоттаан, киһи хараҕар ураты көстөр истииллээх видеолары устан бэлэхтиир.
– Бэйэҥ тускунан кэпсээ, ханнык үөрэҕи бүтэрбиккиний, туох идэлээххиний?
– Горнай улууһун Маҕарас нэһилиэгиттэн төрүттээхпин. АКуоИИ “Социальная культурная деятельность” кэтэхтэн салааны бүтэрбитим. Идэм – култуурунай-маассабай тэрээһини туруорааччы. Ону таһынан эбии үөрэхтээһин учууталабын. Оҕо айымньытын дыбарыаһыгар “Саха КВН” куруһуогун ыытабын. КВН-ҥа “Маҕарас маладьыастара” хамаандаҕа кыттар этим. 2015-16 сылларга дэриэбинэм хамаандатын дьарыктаан, өрөспүүбүлүкэҕэ ситиһиилээхтик кыттан, миигин куоракка үлэҕэ ыҥырбыттара.
– Блогер, устуу эйгэтигэр хайдах кэлбиккиний?
– Видеоблог оҥорорго КВН-ҥа оҕолору уста сылдьан кэрэхсээбитим. Аан маҥнай кыбыстар этим. Биир үтүө күн харчыланыам диэн камера атыыласпытым. Камерабын үлэлэтээри доҕорбун Дьулустан Ноговицын мадьына уолу уста барбытым. Блог оҥорон таһаарбытым. Ол долгунугар спортивнай ханаал арыйбытым. Сыл аҥаара үлэлээн, спорду устар ыарахан диэн санааҕа кэлбитим. Бэйэм спортсмен буолбатахпын. Онон киинэҕэ ырытыы видеоны устар буолбутум. “Первая любовь” японскай киинэни көрөн камераҕа кэпсээбитим. Харахпын быһа симэн баран таһаарбытым, дьон бөҕө үөҕүө диэн саныыр этим. Хата ким да куһаҕаны саҥарбатаҕа. Нэдиэлэ ахсын биир видеоны таһаарабын.
– Билигин үксэ киинэлэргэ ырытыы видеоны оҥороҕун. Бу дьарыгы тоҕо талбыккын быһаар.
– Бииргэ төрөөбүт убайым өрүү миэхэ киинэ туһунан сүбэлээччи. Бу куһаҕан, маны көрүмэ диэн. Киинэни көрөн баран, өрүү мөккүһүү тахсар. Туох үчүгэйин, куһаҕанын быһаарар хаһан баҕарар кэрэхсэбиллээх. Оннук киэҥ эйгэҕэ ырытыы Саха сиригэр суох, онон бастакы саҕалааччы буолабын. Көрөөччү хараҕынан сыаналыыбын, бэйэм санаабын этэбин.
– Биир видеоны уһуларга, оҥорорго үлэ хайдах барарый?
– Обзор оҥоруута кинотеатр кэннэ кэлэн устарга арыый түргэн. Интэриниэттэн трейлеры, сэдэх каадырдары, интервьюлары хомуйуохха наада. Видеоны таҥарга элбэх кэм барар. Холобур, чэппиэргэ киинэ бастакы көстүүтүгэр сылдьабын, бээтинсэҕэ устабын, субуотаҕа бүтэрэн таһаарабын.
– Сахалыы киинэни кэпсиирин ордук тыыннаах, дьоҥҥо чугас курдук иһиллэр. Онно сороҕор хайгыыгын эбэтэр кириитикэлиигин. Ону дьон хайдах ылынар, киинэни устааччылартан эппиэт кэлээччи дуо?
– Бастакы улахан кириитикэм “Күлүк Хомус” буолар. Өйдүүбүн, кириитикэни этэр хайдах эрэ буолар. Онон Петя Хики режиссерга тахсан, кириитикэлээн эрэрбин сэрэппитим. Билигин, уопсайынан, мээнэ киинэ туһунан куһаҕаны этэр, иһитиннэрэр сыыһа дии саныыбын. Бачча ыарыы турар кэмигэр онтон сылтаан кинотеатрга дьон сылдьыыта аҕыйыан сөп.
– «Сэттээх сир” иккис чааһын туох дии саныыгын?
– Ханнык баҕарар киинэҕэ историяны түмүктээһин дьиктилээх, уратылаах. Киинэ бастакы, иккис чааһа үчүгэй, оттон үһүс чааһа хайдах эрэ буолааччы дии. “Игра престолов” бүтэһигин эмиэ ким да сөбүлээбэтэҕэ. Манна эмиэ оннук дьайыы ардыгар баар. Сахалыы олус үчүгэйдик табыллан уһуллубут киинэ. Көрүөххэ сөп.
– YouTube Саха сиригэр сайдар кэскиллээх дуо?
– Сайдыан сөп. GELIXMAX күүскэ үлэлэһэр, 20 тыһ. сурутуулаах, Алена Алексеева хамсатар эрээри, кини нууччалыы тыллаах. Ол да буоллар, 30 сахалыы тыллаах ханаал баар. Билигин бары Instagram ситимигэр олороллор. Иккиэннэрин тутта үөрэниэхтээхтэр дии толкуйдуубун. Нууччалыы тыллаах сурутуу хомуйарга ордук буолуо, ол эрээри сахам тыла миэхэ табыгастаах. Төһөнөн элбэх төрөөбүт тылынан контент тахсар даҕаны, соччонон оҕолорго саха тылы сайыннарарга көмөлөһүө этэ.
– Ханнык киинэлэри ааҕааччыга сүбэлиигин?
– “Дьикти саас”, “Мин үрдүбэр күн хаһан даҕаны киирбэт”, “Сайылык” киинэлэри хайаан да көрүҥ.
– Бу дьарыгын эйиэхэ төһө харчы аҕалар?
– Дьарыгым миэхэ харчыны аҕалбат. Төттөрүтүн барыыбын. Нэдиэлэ аайы киинэ көрөргө баранар. Билиэти “Лена” кинотеатр биэрэн, өйүүр. Интервью уһуларга устааччыны харчылыаххын наада, таксига, батарейкаҕа, уокка игин аччаабыта 1000 солк. туттабын. Бу үлэҕэ сайдабын, инникибэр үлэлиибин.
– Өссө эбии подкаст уһулаҕын. Бу маны кимнээх истэллэр, хайдаҕын быһаар эрэ.
– Подкаст диэн көҥүл кэпсэтии. Ханнык баҕарар тиэмэҕэ халыйан хаалыахха сөп. Туох баҕарар туһунан кэпсэтэбин. Ким баҕарар истиэн сөп. Люба Борисованы кытта бэлэмнэммэккэ эрэ өр баҕайы кэпсэппиппит. Киинэ эйгэтин дьонун кытта олорон кэпсэтии. Онно көрөөччү ыйытыыларыгар эппиэттиибит. Манна кэпсэтэр киһини кытта дьиҥнээхтии билсэҕин, ол миэхэ үчүгэй.
– Салгыы туох былааннааххын?
– Былааным YouTube таһаарар видеоларбын кытта утары ситимнээх. Киинэни ырытар, саҥарар эрээри киинэ эйгэтигэр үлэлиэхпин баҕарабын. Киинэ устан, холонон көрүөххэ наада. Билигин Маҕараска тахсан, аҕыйах кылгас видеолары устубутум. YouTube ханаалбар бааллар. Онон мин кыраттан саҕалаан сайдарга дьулуһабын.
Ааптар: Павел Ильин.