Бүгүн, ахсынньы 19 күнүгэр, Ил Дархан Айсен Сергеевич Николаев быһа эфиргэ Анал этиитин иһитиннэрдэ. Ааһан эрэр сыл түмүктэрин, ситиһиилэрин сырдатта уонна үүнэр сылга сыаллары-соруктары билиһиннэрдэ. Бу көстүбүт Анал этии туһунан Чыамайыкы орто оскуолатын дириэктэриттэн, учууталларытан, үөрэнээччилэриттэн уонна нэһилиэкпит баһылыгыттан Александр Петрович Захаровтан интервью ыллыбыт, санааларын иһиттибит.
Любовь Евгеньевна Романова, Чыамайыкы орто оскуолатын дириэктэрэ:
Кэлэр 2025 сыл — Улуу Кыайыы 80 сылыгар ананар. Онон Ил Дархан бу үүнэр сылы Аҕа дойду көмүскээччилэр сылларынан биллэрдэ. Биһиги үөрэхтээһин эйгэтигэр военно-патриотическай иитиигэ улахан болҕомто ууруллуоҕа диэн кэтэһэбит.
Оттон нэһилиэк баһылыга Александр Петрович Захаров санаатынан маннык үллэһиннэ:
Биһиги нэһилиэк тыа хаһаайыстыбатынан дьарыктанар буоларбыт быһыытынан, бу үүнэр сылга улуустарга 14 хайысхаҕа туспа бырааптар бэриллэллэр, онон улуус бэйэтэ туһанар буолар диэн эппитин сэҥээрэ иһиттим. Оччоҕо ыкса улууһу кытта үлэлэһэн, сайылыктары, хотоннору тутарга, үүт туттарааһыныгар үөскүүр боппуруостары быһаарарга улуус бэйэтэ салайынар, үлэлиир буолар. Ону таһынан, Амма улууһун суола асфальтана сылдьара биллэрилиннэ, эбии Наахараттан Майаҕа тиийэр суолу эмиэ оҥороллоро буоллар, биһиги суолбут, айаммыт быдан чэпчэки буолуо этэ.
Эдэр учууталлар, үөрэнээччилэр өрүс нөҥүө олорор дьон буолалларын быһыытынан, Өлүөнэ эбэни туоруур муоста тутулларын эмиэ сэҥээрэ, сөбүлүү иһиттилэр. Ол туһунан сиһилии:
https://vk.com/wall97384707_404
Нэһилиэкпит, дойдубут сайдарын туһугар бары биир сомоҕо буолан үлэлиэххэйиҥ-хамсыаххайыҥ!
Эрчим КУПРИЯНОВ, «Проба Пера» юнкора, VIII кылаас,
Чыамайыкы, Мэҥэ Хаҥалас.