Биһиги оскуолабыт 2008 сылтан агро хайысхалаах оскуола аатын сүгэн үлэлии-хамныы сылдьабыт. Ол чэрчитинэн сыллата М.Т. Егоровка аналлаах дэкээдэ уонна ыйдааҕы былаан барылын тэрийэр үтүө үгэстээхпит.
Быйыл эмиэ, үгэс курдук, буола турар ыйдааҕы былаан чэрчитинэн, араас тэрээһиннэр куйаар ситиминэн ыытылла тураллар. Ол курдук, олунньу 4 күнүгэр, «Мин — урбаанньыппын» («Я — предприниматель») диэн күрэх үрдүк таһымнаахтык буолан ааста.
Учуутал, үөрэнээччи, төрөппүт кыттыгастаах барыта 13 бизнес-бырайыак көмүскэннэ. Экспертэринэн Үөһээ Бүлүү бөһүөлэгин дьаһалтатын баһылыга М.Ф. Силигиянов, “Мин биисинэһим” Үөһээ Бүлүү улууһун киинин сэбиэдиссэйэ Е.В. Николаева, оскуолабыт директора А.Н. Федоров үлэлээтилэр. Бэйэлэрин идеяларын, бырайыактарын дьиэ кэргэнинэн, учуутал үөрэнээччилиин, төрөппүттүүн ситиһиилээхтик көмүскээтилэр.
Максим Филиппович маннык тэрээһиҥҥэ болҕомтотун ууран өйүүр, ол курдук ааспыт сырыыга үчүгэй бизнес бырайыактаах оҕоҕо смартфон анаабыта. Биирдиилээн бырайыактарга дьоһун сүбэлэри биэртэлээтэ. Екатерина Васильевна бу күрэҕи сэргээтэ, учууталлар уонна төрөппүттэр оҕолору кыра кылаастан саҕалаан тэҥҥэ быһаарсар, хаһаайыстыбаҕа сыстаҕас гына сатабыллаахтык иитэр оруолларын хайҕаата. Бизнес-киин аатыттан сүбэ-ама биэрэргэ бэлэмин биллэрдэ. Элбэх оҕолоох дьиэ-кэргэн ийэтэ Лена Михайловна Прокопьева кыргыттарын 6 “а” кылаастан Эльмира, 4 “а” кылаастан Валерия Семеновалары кытта фоамирантан заколка, өссө аныгы кэм таҥастарын баайыынан утумнаахтык дьарыктанан дьиэ-кэргэн бюджетыгар көмө оҥостор. Онон 1,2 миэстэлэри ылыахтарын ыллылар. Ону учууталлара Мария Николаевна, Галина Прокопьевна сүбэ-ама биэрэн өйүүллэр.
Төрөппүт Игнат Владимирович Трофимов оҕолорун 2 “б”кылаастан Русланы, 4 “б” кылаастан Артуры кытта аныгы технологиянан “Мультимир”, “Мой учитель” сайт приложениеларынан өҥөнү оҥорор икки өттүттэн туһалаах эбит диэн бырайыак көмүскээн, эмиэ 1,2 миэстэни үллэһиннилэр.
Кууруссаны кылгас кэмҥэ көрөр барыыстааҕын, оҕону үлэҕэ иитиигэ, үөрэтиигэ туһалааҕын төрөппүт Любовь Васильевна Долгунова кыыһынаан Самааналыын, 4 “а” кылаас, дакаастаан 2 миэстэ буолла. Бэлиэтээн эттэххэ,элбэх оҕолоох ыаллар маннык бырайыактарга кытталлара элбээн иһэрэ үөрдэр.
Ол курдук, Юлиан Гурьев 4 “б” кылаас үөрэнээччитэ хайыы-үйэ дьонугар торт оҥорсон көмөлөһөр, бииргэ үөрэнэр оҕолорун күндүлүүр, дохуот киллэринэргэ үөрэнээри, учууталын Варвара Михайловналыын “Кусочек счастья” бырайыактарынан 3 миэстэ буоллулар.
Ыал улахан оҕото, 9 кылаас үөрэнээччитэ Күннэй Алексеева төрөппүттэринээн “Семейный бизнес-план Фест” диэн дьон-сэргэ үөрүүлээх түгэннэрин киэргэтэр бырайыактара улахан сүһүөххэ 1 миэстэни ылла.
Улууска нэһилиэнньэҕэ өҥө оҥоруутугар саҥа тэнийэн эрэр “Клининговые услуги” диэн наадалаах бизнес-бырайыагы эмиэ элбэх оҕолоох ийэ Анна Викторовна Федорова улахан кыыһынаан, 10 кылаас үөрэнээччитэ Виолетталыын көмүскээн 3 миэстэ буоллулар.
1”а” кылаастан моркуобу үүннэрии түһүнан идеяларын Юля Долгунова аҕатынаан Никита Васильевичтыын билиһиннэрдилэр.
Онтон 1”б” кылаастан Саша Золотарев учууталын Жанетта Алексеевналыын кукуруза үүннэриигэ бизнес-идеяларын тарҕаттылар.
3”а” кылаастан Нонна Слепцова ийэтин Анжелика Руслановнаны, учууталын Ульяна Васильевнаны кытта оскуола территориятыгар сибэкки үүннэрэн, букет оҥорон атыылыырга уонна ветеран учууталларга букет оҥорон бэлэхтиир бырайыактарын кэпсээтилэр. Бырайыактара 2021 сыл сайыныттан саҕаланан, бастакы букеттарын, гладиолус сибэккилэри Билии күнүгэр ветеран учууталларга бэлэх уунан үөрдүбүттэрэ.
Владик Семенов, 7 кылаас үөрэнээччитэ, мороженай атыылыыр “Фургон с мороженым Bubble cream” бырайыагын идеята үчүгэй, салгыы олоххо киллэриэххэ сөп диэн сүбэлээтилэр. Бэйэтэ урбаанньыт төрөппүт Васитома Васильевна Васильева, элбэх оҕолоох ийэ, 9 кылааска үөрэнэр кыыһын Тамиланы эмиэ бизнес ымпыгар-чымпыгар үөрэтэн саҕалаабытын көрдөрөр бырайыактарын көмүскээтилэр.
Туһалаах тэрээһин инникитин өссө сайдан иһиэҕэ диэн эрэл санаалаахпыт.
Мария Карадчина,
Любамира Осорова.