Саха Өрөспүүбүлүкэтин Бырабыыталыстыбатын 2024 сыллааҕы үлэтин отчуота биһиги нэһилиэкпитигэр «Тускул» култуура киинигэр олунньу 27 күнүгэр буолан ааспыта. Барыта 57 киһи кыттыыны ылбыта. Отчуоту Саха Өрөспүүбүлүкэтин экономикатын миниистирин солбуйааччы Иван Елизарович Елисеев салайан ыыппыта.
Отчуот кэнниттэн Бырабыыталыстыба бөлөҕүн чилиэннэрэ нэһилиэнньэни долгутар ыйытыыларга хоруйдаатылар. Олохтоохтор Үрүҥ Күөлтэн Абалаахха диэри суол тутуутун, аппалар үөскээһиннэрин сэрэтэр программа үлэтин, Өлүөнэ-Туора Күөл уу ханаала барар Синньигэс үрэх муостатын тутуллуутун туһунан ыйыталастылар. Киирбит ыйытыыларга отчуоттуур бөлөх быһааран хоруйдаата.
Маны таһынан бөлөх салайааччыта Иван Елизарович Елисеев биирдиилээн дьону кытта көрсөн кэпсэттэ.
Отчуот түмүгүнэн олохтоохтор Саха Өрөспүүбүлүкэтин Бырабыыталыстыбата 2024 сыллааҕы отчуотун биһирииллэрин биллэрдилэр.
Отчуот кэнниттэн сыана политикатын государственнай кэмитиэтин бэрэссэдээтэлин солбуйааччыта Герасим Гаврильевч Гуриновы көрсөн кэпсэттим.
Кини быһааран эппитин курдук, бу кэмитиэт экономическай интэриэһи, өҥөнү оҥорор тэрилтэлэри тэҥнээһини көрөр, нэһилиэнньэ интэриэһин көмүскүүр. Сүрүн соруга өҥөнү оҥорор тэрилтэлэр сыаналара икки-үс төгүл үрдээбэтин хонтуруоллааһын, бу тэрилтэлэр үлэлэрин көрүү-истии, болҕомто киинигэр тутан илдьэ сылдьыы буолар.
Сыана политиката биһиги өрөспүүбүлүкэбитигэр хайдах оҥоһулларын туһунан ыйыттым. Сыана оҥоһуллан тахсарыгар олус элбэх хайысха учуоттанар эбит. Холобур, ороскуот, үлэлиир киһи ахсаана, нэһилиэнньэ төһөнү төлүүрэ. Онно олоҕуран тариф диэн оҥоһуллар эбит. Бу тариф «Основы ценообразования» диэн федеральнай нормативнай-правовой аактынан (НПА) бигэргэтиллэр. Онон уот, сылаас, уу төлөбүрэ – барыта туспа бигэргэммит тарифтаах буолаллар.
Мин өрөспүүбүлүкэ салалтатын отчуотугар сылдьаммын элбэх туһалааҕы биллим.
Байдам ЕФИМОВ, V кылаас,
С.Д. Флегонтов аатынан Хадаар орто оскуолата, Чурапчы