Бүгүн, ахсынньы 19 күнүгэр Ил Дархан А.С. Николаев Ил Түмэҥҥэ Анал этиитин оҥорбутун кэнниттэн, нэһилиэкпит баһылыга Прокопий Петрович Бубякин олохтоох дьаһалта 2024 сылга туох үлэни ыытан кэлбитин туһунан дьонугар-сэргэтигэр отчуоттаата.
Прокопий Петрович нэһилиэнньэ иннигэр отчуоттуур мунньахтар, үгэс быһыытынан, үс түһүмэҕинэн ыытыллалларын туһунан эттэ.
Бастаан нэһилиэк дьаһалтатын отчуота. Иккис – тохсунньу ыйга улуус баһылыгын отчуоттуур мунньаҕа уонна үһүс – олунньу ыйга Саха өрөспүүбүлүкэтин Бырабыыталыстыбатын отчуота. Итини барытын холбоон туран, нэһилиэк, улуус инники олоҕор туох кыһалҕалар, быһаарылла илик боппуруостар бааллара, ону быһаарарга соруктар, үлэ былааннара оҥоһуллуохтара.
Иккиһинэн, нэһилиэкпитигэр оскуола-саад тутуута. Оскуола дириэктэрэ Г.Д. Захаров иһитиннэрбитинэн, билигин тутуу техническай сорудаҕын оҥоруу түһүмэҕэр сылдьар.
Онтон улуус таһымыгар ылан көрдөххө, Эмис оскуолатын тутуута Соморсун, Покровка, Сатаҕай нэһилиэктэрин оскуолаларын кэнниттэн төрдүс уочаракка турар.
Онтон бүгүн буолан ааспыт нэһилиэк баһылыгын отчуотугар суол, тутуу, благоустройство, социальнай эйгэ, култуура боппуруостарын кэпсэттибит.
Баһылык отчуотун истэн баран олохтоохтор бэйэлэрин санааларын, ыйытыыларын биэрдилэр. Ол курдук киирбит ыйытыылартан иһиттэххэ, нэһилиэк дьонун ордук Арассыыйа үрдүнэн олохтоох бэйэни салайаныыга киирээри турар уларыйыылар долгуталлар эбит.
Оскуола тутуутун боппуруоһун сэргэ дириэктэр Гаврил Дмитриевич Захаров оскуола иннинээҕи остоолболорго сырдык уот үлэҕэ киирэрин туһугар бэйэтин санаатын эттэ.
Нэһилиэк баһылыгын отчуотугар хаарбах дьиэлэртэн көһөрүү бырагырааманан былааннаммыт 5 квартиралаах уопсай дьиэ тутуутун туһунан олохтоохтор чопчулаһан ыйыттылар. Бэдэрээччит Михаил Луковцев генеральнай дириэктэрдээх «М-строй» тэрилтэ икки төгүл аукцион ыытан баран тутууну ыыппатах. «М-строй» тэрилтэ «РНП» (реестр недобросовестных подрядчиков) диэн реестергэ киирбит. Онон Эмис нэһилиэгин дьонугар-сэргэтигэр улахан суолталаах тутууну суобаһа суох бэдэрээччиттэн былдьаан, үһүс бэдэрээччиккэ бэриллэр буолбут. Бу боппуруос эһиил тохсунньу ыйга быһаарыллыахтаах. Барыта этэҥҥэ быһаарылыннаҕына, 5 квартиралаах дьиэбит эһиил ахсынньы ыйга үлэҕэ киириэн сөбүн туһунан баһылык Прокопий Петрович Бубякин иһитиннэрдэ. Билигин олохтоохтор, Н.Н. Константинова салайааччылаах көҕүлүүр бөлөх уонна нэһилиэк дьаһалтата боппуруоһу күүскэ туруорса сылдьаллар. Салгыы бу боппуруоһу олохтоохтор улуус баһылыгын уонна Саха өрөспүүбүлүкэтин Бырабыыталыстыбатын отчуоттарыгар туруорсуохтара.
Хас биирдии тутуу тыа сирин дьонун олоҕун тупсарар, кыһалҕатын быһаарар соруктаах. Бу улахан эппиэтинэстээх үлэ буоларын тутууну ыытар бэдэрээччиттэр хара маҥнайгыттан өйдүөхтээхтэр дии саныыбын.
Эрчим НИКОЛАЕВ, IX кылаас,
В.М. Новиков-Күннүк Уурастыырап аатынан Эмис орто оскуолата, Амма