Биһиги Кэбээйи орто оскуолатын «Дьоҕур» медиакиин юнкордара Кэбээйи нэһилиэгин баһылыгын Илья Иванович Левины кытта атах тэпсэн олорон аһаҕастык кэпсэттибит.
— Үтүө күнүнэн, Илья Иванович! Бүгүн биһиги, Кэбээйи орто оскуолатын “Дьоҕур” медиакиин юнкордара, эһигини аһаҕас кэпсэтиигэ ыҥырабыт. Кэбээйи нэһилиэгэр демография чааһа хайдах туруктааҕый? Эдэр ыал ахсаана төһө эбиллиннэ?
— Үтүө күнүнэн, биһиги Кэбээйибит нэһилиэгэр демография өттүнэн эттэххэ дьоммут ахсаана сылтан сыл аайы аҕыйыы турар. Холобура, былырыын баччаларга 2289 киһи олорор эбит буоллаҕына, быйыл 2114 эрэ киһи олороллор. Эдэр ыччаттар ыал буолаллар даҕаны, үксүлэрэ манна регистрацияламматтар, атын сиргэ куоракка игин регистрацияланаллар уонна эдэр ыалларбыт үксүлэрэ онно олохсуйа бараллар. Онон нэһилиэкпит олохтооҕун сылтан сыл аайы аҕыйыыр.
— Нэһилиэкпитигэр саҥа специалистар төһө кэлэллэрий? Үлэнэн хааччыйыы боппуруоһа хайдаҕый?
Эдэр ыччаттар улаханнык тыаҕа таласпаттар диэххэ сеп, биһиэхэ хата былырыын саҥа түөрт учуутал кэлбитэ. Быйыл ДЮСШ-ҕа икки саҥа специалист эбиллибитэ. Дьиҥэр эдэр ыччат бэйэлэрэ үлэлээн, хамсаан үлэ миэстэтин таһаарыныахтарын сөп этэ диэн саныыбын. Оннук бириэмэ билигин кэлэн турар.
— Кэбээйигэ дьиэ-уот, саҥа тутуулар тустарынан сырдатыаххыт дуо?
Бары билэргит курдук, быйыл биһиэхэ саҥа уһуйааммыт дьиэтэ үлэҕэ киирбитэ уонна үс этээстээх көһүү программатынан дьиэ тутулла турар. Билиҥҥи кэмҥэ тутааччы проблемалардаах буолан тохтоон турар. Бу күннэргэ кэлэн үлэбитин салҕыахпыт диэн эрэннэрбитэ. Саҥа дьылга диэри үлэҕэ киириэ диэн эрэнэбит.
—Таһырдьа тымныйан, хаарбыт аргыый түһэн, саамай уһун дьылбыт кэмэ чугаһаан эрэр. Кыһыҥҥа, кыстыкка бэлэммит хайдаҕый?
Бу Алтынньы суурбэ күнүгэр улуус үрдүнэн «Паспорт готовности» диэн туоһу сурук ылбыппыт. Ити аата бу улуус дэриэбинэлэрэ, нэһилиэктэрэ туох баар социальнай эбийиэктэр бары кыстыкка бэлэмнэр диэн туоһу суруга буолар. Онон, биһиги нэһилиэкпитигэр кыстыкка барыта бэлэм диэхпин сөп.
— Уонна дьэ, түмүккэ, кэлэр 2026 сылга туох үлэ былааннанан турарый?
Онтон биллэрин курдук 2026 сылга биһиэхэ Кэбээйигэ өрөспүүбүлүкэтээҕи Олонхо ыһыаҕа буолар. Туох баар кыахпыт-күүспүт билигин онно барыаҕа. Ол курдук бэйэ бөһүөлэкпитин ыраастанааһын, суолларбытын өрөмүөннээһин, хаарбытын дьаһайыы, дьиэни көтүрүү уонна саҥа түһүлгэни тутуу. Оннук курдук улахан үлэлэр күүтэ тураллар.
— Кэпсэтииин иһин улахан махтал!
Кэпсэтиини ыыттылар: Сайаана Терехова, Виолетта Левина,
«Дьоҕур» медиакиин юнкордара, Кэбээйи орто оскуолата