Дьокуускай куорат таһынааҕы “Энергетик” оҕону чэбдигирдэр лааҕырга үһүс смена ыытылла турар. Бу сменаҕа биһиги, 60 оҕо, Төрүччүнү үөрэтии хайысхатыгар мустан үөрэнэ, сынньана сылдьабыт. Биһиги үлэбитигэр Н.Е. Мординов-Амма Аччыгыйа аатынан “Кэскил” оҕо бэчээтин кыһатын үлэһиттэрэ көмөлөһөллөр. Куратордарбыт Төрүччүнү үөрэтии туһунан кэпсииллэр, көрсүһүүлэри тэрийэн ыыталлар.
Атырдьах ыйын 5 күнүгэр Андрей Саввич Саввинов диэн улахан учуонай, философ лекциятын иҺиттибит. Андрей Саввич лекциятыгар наука туһунан кэпсээтэ. Наука сүрүн сыала олох тутулун, сокуонун үөрэтии буолар. Мин бу лекцияттан киһи киһиттэн туох уратылааҕын сэргээн иһиттим. Онуоха ийэ уонна дьиэ кэргэн оскуолата дьайар күүстээх эбит. Оҕо күн сирин көрүөҕүттэн олоххо тардыһыыта саҕаланар. Ол барыта оҕо аан бастакы оскуолатыттан – ийэ оскуолатыттан саҕаланар. Дьиэ кэргэн оскуолатыгар оҕо тыла сайдар. Төрөөбүт тыла оҕоҕо дьону кытта кэпсэтэрэ, алтыһара эрэ буолбакка, киһи быһыытынан сайдарыгар көмөлөһөр эбит. Дьиэ кэргэнигэр оҕо төрөөбүт тылын нөҥүө дьону кытта алтыһа үөрэнэр. Киһи олоҕун устата санаата, олоҕу көрүүтэ уларыйар эбит эрээри кини саамай кылаабынайа, киһи буолар аналын бэйэтэ бэйэтигэр сайыннаран таһаарыахтаах диэн өйдөөтүм.
Итини таһынан олохпут олуга киһи киһиэхэ эрэлин, итэҕэйиитин, итэҕэлин кытта ыкса сибээстээҕин эмиэ өйдөөтүм.
Мин наука докторын лекциятын бу бастакыбын иһиттим. Истэ олорорго олус интэриэһинэй, киһини толкуйдатар. Андрей Саввич Саввиновка биһигини кытта кэлэн көрсүбүтүгэр истиҥ махталбын тиэрдэбин.
Мичийэ ШЕЛКОВНИКОВА, VIII кылаас,
Н.С. Охлопков аатынан Нам улууһунааҕы гимназия