Мэҥэ-Хаҥалас улууһун А.С. Шахурдин аатынан Төҥүлү орто оскуолатын үөрэнээччилэрэ «Үнүгэс+» диэн ааттанан «Научное лето 2020 онлайн» республикатааҕы сетевой бырайыакка ситиһиилээхтик кытталлар. Сыллата аайы ыытыллар «Үнүгэс» научнай экспедиционнай палаточнай лааҕырбыт быйыл өссө биир интэриэһинэй, киэҥ хабааһыннаах улахан салааланна.
Оҕолор айылҕабыт араас көтөрдөрүн билээри – орнитология, үөнүн-көйүүрүн чинчийээри – энтомология уонна эмтээх үүнээйилэри үөрэтэр хайысхалары талан үлэлии сылдьаллар.
Биология учуутала, директоры иитэр-үөрэтэр үлэҕэ солбуйааччы Любовь Баишева кыыһынаан 9 кылаас үөрэнээччитэ Олесялыын, от ыйыттан хомурдуостары үөрэтиилэрин саҕалаары бэлэмнэнэ сылдьаллар.
Биһиги хамаандабытыгар 7 кылаас үөрэнээччитэ Куннэй Федотова эмтээх үүнээйилэри үөрэтиэм этэ диэн баҕатын биллэрэн, дөлүһүөн туһатын үөрэтэр. Билигин хатарыы үлэтигэр сылдьар. Сотору отоно ситтэҕинэ чинчийиитэ өссө дириҥиэ.
Химия учуутала Надежда Слепцова игирэ кыргыттарынаан, 7 кылаас үөрэнээччилэрин Дайаана, Сайаана Слепцовалары кытта эмиэ эмтээх от хомуйуутунан дьарыктана сылдьаллар. Тэлгэһэ иһигэр үүнэр эмтээх оттору бэркэ диэн үөрэтэн, хатаран, сөптөөх ньыманы туттан хаһааныынан дьарыгыраллар.
Биология учуутала Любовь Иванова уолаттарынаан Саша, Вася Ивановтары кытта сайыҥҥы чинчийиилэрин саҕалаатылар. Саша 5 кылаас үөрэнээччитэ быйыл төрдүс сылын тыҥырахтаах көтөрдөрү, чуолаан элиэлэри үөрэтэр. Уопсайа быйыл сайын устата 8 хайысханан кэрийэн араас тыҥырахтаах көтөрдөр уйаларын көрдөөтө. Буллаҕына, чинчийэр ньыматын кэҥэтэн суукка устата кэтээн көрүөхтээх, оҕолорун аһатарын, туох-хайдах майгылаахтарын кэтиэхтээх.
Хамаандабыт саамай кыра кыттааччыта Вася, 3 кылааһы бүтэрдэ. Быйыл энтомология салаатын иккис сылын талла. Буорга, сир үрдүн бастакы араҥатыгар олохсуйар үөннэри Барбер тоһуурдарын оҥорон хомуйан ылан чинчийэр. Вася бэс ыйын 26 күнүгэр буолбут «Калининград-Камчатка» видеомост конференциятыгар бу үлэтинэн ситиһиилээхтик кыттан биһирэбили ылла.
Биһиги үөрэнэр, олорор дьиэбит – Хотун Төҥүлү киэҥ алааспыт айылҕатын, сирин-уотун чинчийэбит. Ону таһынан Уус-Алдан улууһун Бэрт Ууһун нэһилиэгин тыҥырахтаах көтөрдөрүн, алаастарын, үөннэрин үөрэтэбит. Бу Улуу Өлүөнэ эбэбит илиҥҥи тэллэҕэр былыргы үйэлэргэ үөскээбит аарыма алаастарбыт Аан Айылҕаларын үөрэтэр чинчийэр чиэскэ тиксибиппит – биһиги дьолбут буолар! Өлүөнэ диэн ийэтин, Алдан диэн эдьиийин тапталларыгар сууланан улааппыт Уус-Алдан улууһа уонна Өлүөнэ тэбэр сурэҕэр куруутун бүөбэйдэнэн олорор Мэҥэ-Хаҥалас улууһа бу курдук кыракый сиэннэрин күүһүнэн Аан айылҕаларын көтөрдөрүн-сүүрэрдэрин төһө, хайдах олороллорун биллэрэ турдахтара!
Мэҥэ-Хаҥалас улууһун Төҥүлү орто оскуолатын «Үнүгэс+» хамаандата