Томпо оройуонун Кириэс-Халдьаайы сэлиэнньэтин Эколого-биологическай киинин иһинэн быйыл ыытыллар «Научнай сайын-2020» бырайыак чэрчитинэн «Экознаток» хамаандаттан 10 оҕо кыттыыны ылла. Оҕолор сүрүннээн дьиэ таһынааҕы, сэлиэнньэ кытыытынааҕы үүнээйилэри кэтээн көрдүлэр, гербарий хомуйан үөрэттилэр, өрөспүүбүлүкэҕэ ыытыллар фенологическэй күннэргэ көхтөөхтүк кытыннылар.
Кириэс-Халдьаайы сэлиэнньэтэ Өлүөнэ эбэ уҥа тардыытыгар сытар саамай улахан салаата Алдан өрүс үрдүгэр турар. Тапталлаах Алдан эбэбит уута, биэрэгэ ыраас, кыраһыабай буоларын туһугар сыллата ыраастааһын үлэтин ыытабыт. «Биһиги Алдан өрүс оҕолоробут» диэн бырайыак оҥорон Алдан кытыытыгар олорор нэһилиэктэри кытта билсэн, өрүспүтүн харыстыыр тэрээһиннэри ыытабыт. Эбэ уута ыраас эрэ буоллаҕына биһиги эмиэ доруобай буоларбытын дьэҥкэтик өйдүүбүт.
Быйыл ыытыллыбыт «Научнай сайын 2020» оҕолорго элбэх билиини, туһаны аҕалла. Ол курдук, Сахабыт сирин биллэр көстөр учуонайдара ситим нөҥүө араас интириэһинэй конференциялары тэрийдилэр, билбэт боппуруостарга тута эппиэттииллэрэ олус көдьүүстээх буолла.
Инникитин бу бырайыак сайда- чэчирии турарыгар, Сахабыт сирин саамай хорук тымыра- Өлүөнэ эбэбит уута дьэҥкир ыраас буоларын туһугар эдэр экологтар үлэлиир баҕа санаалара улахан.
Махтал мааны тылларын бырайыак ааптардарыгар, тэҥҥэ үлэлэспит учуонайдарга аныыбыт, Сахабыт сирин дьикти, таайыллыбатах көстүүлэрин арыйарга тирэх, күүс-көмө буоларгытыгар.
Сыромятникова С.К. «Экознаток» хамаанда салайааччыта,
ЭБК педагога Томпо оройуонун Кириэс-Халдьаайы сэл.
#научноелето2020онлайн
#малая академия наук РС(Я)
#Региональное отделение МАН РС(Я) МБУ ДО «Центр творческого развития и гуманитарного образования школьников» МР «Олекминский район» РС(Я)