Муус устар 15 күнүгэр Ф.И. Авдеева аатынан Оҕо айымньытын дыбарыаһыгар Дьокуускай куорат Н.И. Шарин аатынан 39 №-дээх орто оскуола 7 «Г» кылааһын үөрэнээччитэ, «Утум» айар мастырыскыай талааннаах иитиллээччитэ Нарыйа Поротова «Оҕолор ааптардар» бырайыак чэрчитинэн ыытыллыбыт «Мечты полярной мишки» диэн кинигэҕэ уруһуйдарын сүрэхтэниитэ уонна «Алыптаах эйгэ» персональнай быыстапкатын үөрүүлээх арыллыыта буолан ааста.
Минньигэс саламааттаах арыылаах алаадьынан айах тутан, дьоҕус саалаҕа дьон-сэргэ тоҕуоруһа мустубут. Саала эркинин тула биһиги Нарыйабыт дьэрэкээн уруһуйдара кэчигирээн тураллар. Тэрээһин долгутуулаах түгэнинэн кыһыл лиэнтэнии быһыы буолбута.
Биһиги түөрт буолан кылааспыт салайааччытын кытта Нарыйа үөрүүтүн үллэстэммит, кинигэҕэ баар хоһоону ааҕан эҕэрдэлээтибит.
Күндү бииргэ үөрэнэр Нарыйабыт талба талаана, уруһуйдуур дьоҕура сайда турдун, оҕо-аймах сэҥээриитин ыла турдун!
Алина Иванова, Айыына Габышева
7 «Г» кылаас үөрэнээччилэрэ
Н.И. Шарин аатынан 39 №-дээх орто оскуола, Дьокуускай