Сэттэлэриттэн уон алталарыгар диэри саастаах оҕолор, лааҕыр 8 этэрээтиттэн сөбүлээбиппитин талан, дистанционнай ньыманан 21 хонук устата сынньалаҥы уонна туһалаах дьарыгы тэҥҥэ дьүөрэлээн эргиччи сайдарга дьулуһабыт.
Лааҕырбыт «Юная киноакадемия», «Төрүт дорҕоон», «Умелые ручки», «Спектр творчества», «Веселый турист», «Юный фермер», «Юный спасатель», «Юный модельер» этэрээттэрдээх. Холобура, мин, «Умелые ручки» этэрээккэ сылдьабын, салайааччыбыт — Мария Петровна Сыромятникова. Манна биһиги биир күн ас астыыбыт, иккис күн араас матырыйаалтан оҥоһук тигэбит, кырыйабыт.
Миигин батыһан кыра балтым 5 саастаах Мила эмиэ онлайн ыытыллар дьарыктары тэҥҥэ көрсөр, сорудахтары боччумуран олорон истэр, хайдах сатыырынан толорор. Аҕыйах күн дистанционнай лааҕырга сылдьан элбэҕи биллибит. Ол курдук, фруктаттан салат оҥоро үөрэннибит, блины астаатыбыт, төлөпүөммүтүгэр фетр матырыйаалтан хах тигэн саҕалаатыбыт. Лааҕыр уопсай ыытар тэрээһиннэригэр кыттан, киинэ күнүгэр анаммыт биир сайыҥҥы күммүтүн устубуппут, аны «Минута славы» диэн конкурска кыттар баҕалаахпыт. Мин дорҕоонноохтук хоһоон ааҕыам, балтым үҥкүүлүөҕэ.
Бу курдук үөрэ-көтө 21 күммүтүн бииргэ туһалаахтык атаарыахпыт, элбэҕи билиэхпит диэн эрэнэбин.
Лариса Ноговицына,
Илья Чаҕылҕан аатынан Намнааҕы алын сүһүөх оскуолатын үөрэнээччитэ.