Атырдьах ыйын 19-30 күннэригэр Турцияҕа ыытыллыбыт аан дойдутааҕы дуобат чемпионатыгар Нам улууһун икки эдэр спортсменката, Дайана Габышева уонна Анита Данилова, кыайыы көтөллөнөн кэллилэр.
Ол курдук, Дайана Габышева аан дойду Кубогын кыайан дьахталларга чемпионка, оттон Анита Данилова түргэн оонньууга аан дойду чемпионкатын ааттарын ыллылар. Бу күннэргэ кинилэр тренердэрэ, Ньургун Тимофеев аатынан Намнааҕы оҕо олимпийскай резервэтин оскуолатын уһуйааччыта Василий Прокопьевы кытта кэпсэттибит. Василий Иванович үөрэнээччилэрин ситиһиилэриттэн олус үөрэр, киэн туттар.
— Кыргыттар 2015 сылтан лааҕырга сылдьыбыттара. 2016 сылтан биһиги оскуолабыт дуобат кылааһыгар миэхэ дьарыктарын саҕалаабыттара.
Дайана Габышева — Нам 2-с №-дээх оскуолатын 6-с кылааһын туйгун үөрэнээччитэ. Анита Данилова Намнааҕы гимназия 6-с кылааһыгар эмиэ наар «5» сыанаҕа үөрэнэр. Бу кыргыттар эрчилиигэ сыһыаннара олус бэриниилээх. Бастакы кылаастан биричиинэтэ суох биир да күнү көтүппэккэ дьарыктаналлар. Оннооҕор пандемия кэмигэр куйаар ситимин нөҥүө Playok, Iidraughts сыһыарыыларынан күрэхтэһэн, тэтимнэрин ыһыктыбатахтара.
Кыргыттар бу улахан кыайыыга элбэх кыһамньыларын биэрэн, дьулуурдарын көрдөрөн кэллилэр дии саныыбын. Дайана 2019 сыллаахха дуобакка Россияҕа бастыыр иһин чемпионакка 3 миэстэ, Дайаналаах Анита иккиэн 2019 сыллаахха Турция Измир куоратыгар ыытыллыбыт аан дойду күрэҕэр чемпионнаабыттара, эһиилигэр, 2020 сыллаахха, Дайана бу күрэххэ 2 миэстэни ылан, ситиһиитин өссө биирдэ чиҥэппитэ. 2021 сыллаахха Анита Саха сирин чемпионатыгар бастаабыта, Россияҕа молниеноснай программаҕа үһүс үктэлгэ тахсыбыта, оттон Дайана Россияҕа классическай программаҕа 2 миэстэ буолары ситиспитэ.
Төрөппүттэригэр Дамира Юрьевна Аманатоваҕа, Александра Ивановна уонна Андрей Дмитриевич Даниловтарга улахан махталбын тиэрдэбин. Кинилэр — оҕолоро ситиһиилэх буолларын туһугар бүтэһик харчыларын биэрэр олус кыһамньылаах төрөппүттэр. Тэрилтэбитигэр күрэхтэһиигэ үп-ас көрүллэр. Ол гынан баран, төрөппүттэр бэйэлэрэ уйунан ыыталлара элбэх.
Дайаналаах Анита үрдүк ситиһиилэрэ — күүстээх дьарык түмүгэ. Кыргыттар иккиэн 5 сылы быһа тохтоло суох үлэлээннэр, кыайыыга тиийдилэр. Ол курдук, кыһын, күһүн оскуолаҕа күүскэ дьарыктанабыт, онтон сайын лааҕырга сылдьаллар, эбии сорудах ылан сатабылларын эбинэллэр, биир да күн тохтообокко саҥаттан саҥаны билэргэ тардыһаллар, — диэн Василий Иванович санаатын үллэстэр.
Тренери, эдэр спортсменкалары аан дойду чемпионкаларын үрдүк аатын сүкпүттэринэн эҕэрдэлиибит, өссө да кыайыы кэлэ турдун диэн алгыыбыт.
Анастасия КОРЯКИНА.
Энсиэли.рф.