1924 сыллаахха улуу сирдьит Владимир Ильич Ленин суох буолбутугар Уолба олохтоохторо, үөрэнээччилэрэ мунньахтаан, Надежда Крупскаяны кытта суругунан сөбүлэһэн Владимир Ильич Ленин аатын иҥэриини ситиспиттэрэ.
Онтон ыла 100 сыл ааста. Ону кытта Саха сиригэр пионерия тэриллибитэ 100 сылын бэлиэтээтибит. Онон оскуолабытыгар сүрдээх улахан үөрүүлээх бырааһынньык буолан ааста. Араас көлүөнэ пионердара сборга хаамтылар, речевка эттилэр, пионердар гимнарын ”Взвейтесь кострами” ыллаатылар. Үбүлүөйүнэн сибээстээн туйгун, ситиһиилээх олимпиадник, спортсмен, чинчийэр үлэнэн дьарыктанар үөрэнээччилэри, үлэһиттэри наҕараадалаатылар. Онтон оҕолоро кылаастарынан оскуола историятын сырдатар Музей муннуктары тэрийэн кэпсээтилэр. Ол кэнниттэн учууталлар уонна үөрэнээччилэр холбоһуктаах наһаа үчүгэй кэнсиэр көрдөрдүбүт. Биир дойдулаахпыт буойун поэт Макар Хара суруйбут “Уолба оскуолатын оҕолоругар” ырыатынан бука бары хордаатыбыт. Ол кэнниттэн бары кэлбит дьон сандалы остуол тула быраһаанньыктааҕы минньигэс аһы аһаатыбыт.
Ити курдук 100 сылга биирдэ буолар улахан суолталаах быраһаанньыкка сылдьыбыппыттан олус дьоллоннум. Төрөөбүт Уолбам сайда, үүнэ турдун!
Ангелина ДАНИЛОВА, Х кылаас, Уолба, Таатта