Тохсунньу 26 күнүгэр В.П. Ларионов аатынан Майа агро хайысхалаах оскуолатын «Көтөр дьиэтэ» бырайыак чэрчитинэн көҕөн кустар сымыыттарын инкубаторга уктулар.
5 «А» кылаас үөрэнээччилэрэ Ирина Титовна Карпова уонна Роза Михайловна Сыромятникова салайыыларынан үлэлээн саҕалаатылар.
Манна оҕолор сымыыты ыйааһынныыр, мээрэйдиир, сууйар, инкубатордыыр сүрүн ирдэбиллэр үөрүйэхтэрин билэллэр.
Ону таһынан, алын сүһүөхтэн 2 «А» кылаас үөрэнээччилэрэ учууталларын Ильина Елена Николаевнаны кытары ыкса үлэлииллэрэ былааннанар.
Уопуттуур үлэлэр этэҥҥэ бардахтарына бастакы кус оҕолоро барыллаан олунньу 8 күнүгэр тахсаллара сабаҕаланар. Оттон бүгүн угуллубут сымыыттар олунньу 19 күнүгэр күүтүллэр.
Кус оҕолоро сымыыттарын тэһэн таҕыстахтарына, оҕолор көрөргө-харайарга, иитэргэ үөрэниэхтэрэ.
Бу бырайыакпытыгар күүс-көмө буолбут, инкубатордары ылыыга көмөлөспүт улууспут баһылыгар Дмитрий Иванович Тихоновка оскуола аатыттан улахан махталбытын тиэрдэбит.
«Мэҥэбил» пресс-киин, В.П. Ларионов аатынан Майа орто оскуолата.