«Кинигэ – билии төрдө, кинигэ үтүө доҕор, сүбэһит» диэн этии баар. Кырдьык да оннук. Кинигэни кыра эрдэхпититтэн доҕор оҥостон ааҕабыт, элбэх билиини ылабыт.
Биһиэхэ, Харбалаах орто оскуолатын оҕолоругар, сааскы сынньалаҥмыт бэрт туһалаахтык барар. Нэһилиэкпит модельнай библиотекатын үлэһитэ Рузанна Ахмедовна «Неделя детской книги» диэн Бүтүн Арассыыйатааҕы аахсыйа чэрчитинэн, Сомоҕолоһуу сылыгар аналлаах олус интэриэһинэй тэрээһиннэри ыытта. Оттон бүгүн, муус устар 2 күнэ, – Оҕо кинигэтин күнэ.
Эһиги хаһан эмит «Литературное ГТО» диэни истибиккит дуо? Ааҕыыга эмиэ ГТО туттарыахха сөп эбит. Кыттааччы оҕолорго хас биирдиилэригэр «Ааҕар зачетка» туттардылар уонна биэс араас сорудахтары толорон, элбэх баалы хомунарга күрэхтэстилэр. Түһүмэхтэрэ да олус интэриэһинэйдэр: «Литературный спринт»-ыйытыыларга түргэн хоруй, «Метание цитат» -остуоруйаны таай, мүнүүтэҕэ сахалыы тылынан ааҕыы, «Остуоруйа дьоруойдарын таай», «Өс хоһооннорун төһө билэҕин?». Оонньуу түмүгэр миэстэлэспит оҕолору минньигэс сакалаатынан наҕараадалаатылар.
Ол курдук, биһиги биир дойдулаахпыт, саха норуодунай суруйааччыта Николай Якутскай араас омук остуоруйаларын түмпүт «Биирдии остуоруйа» диэн оҕолорго аналлаах кинигэтинэн дьиэ кэргэҥҥэ «Литературнай лотуо» оонньуу ыытылынна. Кыттыбыт дьиэ кэргэн «Биирдии остуоруйа» кинигэттэн 9 остуоруйаны аахпыттарын тургутан, лотуо карточкаларын сөптөөх эппиэттэринэн толорорго кыһаннылар. Төһө да икки эрэ ыал кытыннар, оонньуу олус бэһиэлэйдик барда.
Оҕолоор, ааҕар киһи — билиилээх, билиилээх киһи — сайдыылаах, сайдыылаах киһи — ситиһиилээх. Кинигэни өрүү доҕор оҥостуҥ!
Сиһилии:
Тимур Семенов, 11 кылаас, Н.Г. Золотарев-Якутскай аатынан Харбалаах орто оскуолата, Үөһээ Бүлүү