Марат Тарабукин Н.С. Тарабукин аатынан Улахан Чыыстай орто оскуолатыгар 11 кылааска үөрэнэр. Дьааһыла сааһыттан ыстаадаҕа сылдьар. Сайын аайы ийэтин, кыра балтын кытары атынан мэҥэстэн, бөһүөлэктэн таба ыстаадатыгар тиийэллэр.
Марат оскуолаҕа киириэҕиттэн, «Оралчимна» лааҕырга сылдьар буолбута. Кыра кылаастан ыстаадаҕа сайылаабыт оҕо буолан, табаһыт үлэтин, олоҕун номнуо этинэн-хаанынан билэ улаатта. Оннооҕор быыс булан кыһыҥҥы сынньалаҥар ыстаадаҕа эмиэ баран кэлэр.
«Магир» таба ыстаадатын общинатын бэрэссэдээтэлэ, «Оралчимна» лааҕыр салайааччыта Екатерина Егоровна Дьячкова кэпсииринэн, ыстаада оҕолоро күһүн оскуолаҕа баралларын саҕана, хайаан даҕаны «Чикти» («быһый», «түргэн») күрэҕи ыыталлар эбит. 2019 сыллаахха бу күрэххэ Марат бастакы миэстэ ылан, хоройунан (2 саастаах таба) бириэмийэлэммит. Быйыл кини бэйэтин сыратынан, билиитинэн, кыаҕынан «World Skills» күрэҕин чэрчитинэн ыытыллар «Табаһыт-механизатор» идэ көрүҥэр маҥнайгы миэстэни ылла. Табылыннаҕына, финалга кытта барыахтаах.
«Ол аата уолбут ыстаадаҕа сылдьан, өй, эт-сиин өттүнэн сайдан улааппыта, үлэҕэ такыллыбыта, бу барыта кини ситиһиилэриттэн көстөр. Инники олоҕор бэлэмнээх, сайдыылаах буолуутугар ыстаадаҕа сылдьыбыт кэмнэрэ туһата суох хаалбата диэн биһиги үөрэбит. Инникитин даҕаны элбэх ситииһиилэри уолбутугар баҕара хаалабыт», — диир Е.Е. Дьячкова.
Онтон эһиилгиттэн таба ыстаадатыгар үлэлиир оҕоҕо үс ыйга хамнас төлөнөр буолара, бу эдэр оҕолорго, кырдьык, стимул, инникигэ тардыһыы буолар. Бу маннык үтүө саҕалааһыннартан Арктика олоҕо сайдар кэскиллээх. Өбүгэ төрүт дьарыгын таба иитиитин эдэр көлүөнэҕэ тиэрдэрбит — бу буолар төрөөбүт төрүт тылбыт, култуурабыт, омукпут инникитэ.
Суруйда Анна СЛЕПЦОВА.