Таатта улууһун ытык кырдьаҕаһа, Орто-Амма нэһилиэгин бочуоттаах олохтооҕо, үлэ, тыыл бэтэрээнэ Мотрена Даниловна Егорова быйыл Улуу Кыайыы 80 өрөгөйдөөх сылыгар тохсунньу 29 күнүгэр 90 ытык сааһын туолбута.
Кини 1935 сыллаахха Уус-Амма нэһилиэгэр төрөөбүтэ. «Сэрии саҕаланыытыгар алта саастаах кыыс оҕо этим, ол да буоллар дьоммун кытта тэҥҥэ үлэлээн Кыайыыны уһансыыга киллэрбит бэйэм кылааттаахпын», — диэн ахтар.
Мотрена 12 сааһыттан колхоз үлэтигэр бурдук астааһыныгар, ыһыыга оҕус сиэтиитигэр, түүтэх бурдугу тиэйиигэ үлэлээбитэ. 20 сыл колхозка ыанньыксыттаабыта, Уодайга «Коммунизм» колхозка үлэлии сылдьан «Бастыҥ ыанньыксыт» үрдүк аатын ылбыта. Кэлин Харбалаахтааҕы СПТУ-га таҥас сууйааччынан, онтон чох разреһыгар харабылынан үлэлии сылдьан бочуоттаах сынньалаҥҥа тахсыбыта.
Үлэҕэ, олоххо көхтөөх Мотрена эдэр эрдэҕинэ сүүрүүнэн дьарыктанан оройуоҥҥа күрэхтэһиигэ кыттара. Кини балыксыт бэрдэ, кинини бүтүн өрөспүүбүлүкэ балыксыттара билэллэр, «эдьиийбит» диэн ааттыыллар.
Иллэҥ кэмигэр оҕуруонан киһи хараҕа саатыыр оҥоһуктарын оҥорон дьиэтин иһин киэргэппитин сөҕө көрөҕүн.
Аҕа дойду сэриитин ветерана Гаврил Васильевич Егоровтыын ыал буолан алта оҕону төрөппүттэрэ, кэргэнэ эрдэ олохтон туораан оҕолорун бэйэтэ атахтарыгар туруортаабыта.
Гаврил Васильевич 1943 сыллаахха сэриигэ ыҥырыллан баран Забайкальскай фронт 67 отдельнай пулеметнай батальоҥҥа пулеметчигинэн сэриилэспит. Хабырылла болуотунньук, оһохчут быһыытынан Харбалаах бөһүөлэгин тутуутугар үлэлээбитэ.
Улуу Кыайыыны уһансыбыт Мотрена уонна Хабырылла Дьөгүөрэптэр ааттарын ааттатар алта оҕоломмуттара, элбэх сиэннээхтэр, хос сиэннээхтэр. Мотрена Даниловнаны биир дойдулаахтарын ааттарыттан Улуу Кыайыы күнүнэн истиҥник эҕэрдэлиибит уонна чэгиэн доруобуйаны, уһун үйэни баҕарабыт!
Светлана Винокурова, Харбалаах, Таатта.
keskil14.ru