Амма улууһун Эмис нэһилиэгин эдэр бөҕөстөрө сааскы сынньалаҥнарыгар тренердэрин Аркадий Николаевич Тастыгины кытта Кабардино-Балкария өрөспүүбүлүкэтин киин куоратыгар Нальчикка эрчиллэ сылдьаллар. Тустууктар айаннара кулун тутар 18 күнүттэн Москва куораттан саҕаламмыта.
Кулун тутар 20-31 күннэригэр Кавказ хайатын тэллэҕэр турар, үгүс норуоттар түмсэн олорор куоратыгар Нальчикка 10 күннээх күүстээх дьарыгы ааһа сылдьаллар.
Үгүс туристар ыра санаалара буолбут Эльбрус хайатыгар тахса сырыттылар.
ЭДЭР БӨҔӨСТӨР ДНЕВНИКТЭРИТТЭН
Оҕолор бэйэлэрин бэлиэтээһиннэрин дневниктэригэр суруналлар. Бу тренер Аркадий Николаевич Тастыгин дьарыктыыр оҕолорун иннилэригэр туруорар биир сүрүн соруга.
Эдэр бөҕөстөр Россия киин куоратыгар Москваҕа тугу сэҥээрбиттэрий? Тугу бэлиэтии көрбүттэрий?
Кулун тутар 18 күнэ. Биһиги Дьокуускай куораттан Москваҕа сарсыарда 8 чаас 35 мүнүүтэҕэ көппүппүт. Самолекка олорон үөһээ халлаантан хас да куораты, хайалары, бурдук үүннэрэр сирдэри көрдүм. Самолетунан көтөр интэриэһинэй.
Москва биһиги Эмиспитин кытта бириэмэтинэн 6 чаас араастаах. Россия киин куората наһаа кыраһыабай, улахан. Кыһыл болуоссакка туран былыр манна хайдах эбитэ буолуой дии санаатым. Кыһыл болуоссакка өр сырыттыбыт. Куорат устун экскурсиялаатыбыт.
Алеша Захаров, V кылаас
Кулун тутар 18 күнэ. Самолекка олорон Москваҕа көттүбүт. Кытыыга олорор буоламмын, түннүк көстүбэт. Самолетунан көтөр үчүгэй баҕайы. Үөһэ көтөн тахсарыгар кулгааҕын бүөлэнэр. Саха сирин кытта Москва 6 чаас араастаах.
Москва биһигини үчүгэйдик көрүстэ. Кыһыл болуоссакка элбэҕи санаатым. Болуоссат маннык кэрэ көстүүлээх буоларын туһугар төһө өр туппуттара буолуой диэн санаан аастым.
Москва киһи эбитэ буоллар, кини хайаан да үчүгэй киһи буолуо этэ. Соҕуруу куорат буолан, халлаан сылаас.
Айгылаан Николаев, VII кылаас
Кулун тутар 18 күнэ. Самолекка олорон дьэ көттүбүт. Үөһэттэн куораты көрөр үчүгэй. Көтөн истэхпинэ, кулгааҕым бүөлэннэ. Ону соччо сөбүлээбэтим. Сарсыарда 8 чаас 35 мүн. көппүппүт. Онтон Москваҕа кэлбиппит – сарсыарда 10 чаас. Бириэмэ олох да ааспатах курдук буолан таҕыста.
Россия киин куората наһаа кыраһыабай уонна улахан. Арай кини киһи эбитэ буоллар хайдах буолуой этэй? Мин санаабар, улахан да улахан киһи буолуо этэ.
Кыһыл болуоссакка Россия Президенин Владимир Путины көрсүөхпүт дии санаабытым.
Салгыы поеһынан Нальчик куоракка сбордана айаннаатыбыт.
Даниэл Петров, III кылаас
***
Кулун тутар 18 күнэ. Москваҕа дьэ көттүбүт. Самолетунан көтөн иһэн бааһыналары, өрүстэри, тыаны, айылҕаны – барытын көрдүбүт. Сиртэн хантайан эрэр көрөр былыттарбын ортотунан көтөн аастым.
Москва куорат биһигини үчүгэйдик көрүстэ. Арай кини киһи эбитэ буоллар, кыраһыабай, өйдөөх, сэмэй киһи буолуо этэ.
Кыһыл болуоссакка туран, болуоссаты өр туппуттара буолуо дуу санаатым. Москваҕа хаардара ууллубут.
Салгыы поеһынан айаннаатыбыт. Нальчик куоракка тиийиэхтээхпит.
Матвей Тимофеев, VI кылаас
***
Кулун тутар 18 күнэ. Самолетунан былыттары быыһынан көттүм. Россия куораттарын үөһэттэн олорон көрдүм. Самолетунан көтөр үчүгэй. Биһиги Эмиспит Москватааҕар быдан кыра эрээри, бу биһиги төрөөбүт дойдубут. Ол иһин кини миэхэ син биир күндү эбит.
Москва куоракка аан бастаан Кыһыл болуоссакка сырыттыбыт. Ол иһин Россия киин куората биһигини Кыһыл болуоссатыгар көрүстэ диэн этэбин. Наһаа үчүгэй, улахан куорат. Кыһыл болуоссакка Президеммитин Владимир Путины көрүөм дии санаабытым.
Москва кэрэ айылҕалаах. Мастара үрдүктэр, кэтиттэр, улахаттар.
Алик Ноговицын, III кылаас
Кулун тутар 18 күнэ. Дьокуускайтан Москва куоракка көттүбүт. Самолекка кулгааҕым бүөлэннэ. Бу иннинэ биһиэхэ Эмискэ Илья Анатольевич Солдатов турнира буолбута. Онно күрэхтэспиппит. Өссө алгыс ылбыппыт. Ол алгыс биһиэхэ билигин да туһалыыр дии саныыбын.
Москва биһигини үчүгэйдик көрүстэ. Манна сып-сылаас, салгына ып-ыраас. Саас кэлбит. Улааттахпына Россия киин куоратын олохтооҕо москвич буолуом этэ дии санаатым.
Эрсан Васильев, IV кылаас
Кулун тутар 18 күнэ. Самолекка олорон Москва куоракка көттүбүт. Үөһэттэн олорон сири-дойдуну көрөр астык баҕайы. Биһиги Эмиспититтэн атына элбэх. Холобур, бириэмэтэ. 6 чаас уратылаах. Россия киин куората биһигини үчүгэйдик көрүстэ. Киһи эбитэ буоллар олох үчүгэй киһи буолуо этэ дии саныыбын.
Кыһыл болуоссакка сылдьан, маннык үчүгэйи хайдах тутан таһаарбыттара буолуой дии санаатым. Куорат барыта улахан дьиэлэртэн турар. Сорох сирдэринэн тыа, айылҕа баар.
Сеня Васильев, VI кылаас