ЮНКОР ДНЕВНИГИТТЭН
От ыйын 29 күнэ. «Кэскил» медиа оскуола юнкордара Россия киин куоратыгар Москваҕа үөрэх тууругар сылдьыбыппыт алтыс күнэ. Бу күн дьон-сэргэ сэҥээрэн көрөр-истэр мессенджерыгар ВКонтакте киин офиһыгар экскурсияҕа сырыттыбыт.
Бастаан ВКонтакте офиһын иһин көрдүбүт. Олус интэриэһинэй. Киһи эрэ үлэлиэн баҕарар сирэ. Бастаан көрөргө, үлэлиир сир дии санаабаккын. Хайдах эрэ сынньалаҥ киинин курдук. Ол эрээри манна сүрүн бириэмэни сынньалаҥҥа уурбаттар. 11 тыһыынчаттан тахса киһи тохтоло суох бэйэлэрин кииннэрин сайыннарарга, тарҕатарга үлэлииллэр.
Салгыы Егор Еремин биһигини кытта көрсөн, бэйэтин сүрүн үлэтин туһунан сиһилии билиһиннэрдэ, кэпсээтэ. Бэлиэтээн, өйдөөн истибитим диэн кини өссө оскуола үөрэнэ сылдьан, 16 сааһыттан ВКонтакте тэрилтэтигэр кыра кыралаан үлэлээн саҕалаабыт. Билигин 18 саастаах Егор Еремин ВКонтакте тэрилтэтигэр коммуникация менеджеринэн үлэлии сылдьар. Мин маны соһуйа, сонурҕуу иһиттим. «Кырдьык, киһи баҕардаҕына оскуола сааһыттан улахан тэрилтэҕэ үлэлии киириэн сөп эбит дии» дии санаатым.
Бу кэнниттэн бары «Мореон» аквапаркаҕа бардыбыт. Бу Москваҕа атаарар бүтэһик сынньалаҥмыт. Итинник санаатахпына, хомойуох санаам кэлэр. Оҕолор олуһун дуоһуйдубут. Сорохтор бастакытын маннык курдук сиргэ сылдьар буолан үөрүү, барыта интэриэһинэй, сонун, сэргэх. Аквапарк сылаас тыынын иҥэринэн «Измайлова Бета» гостиницабытыгар кэллибит.
Маннык курдук Москва куоракка үөрэх, сынньалаҥ бырагыраамматын түмүктээтибит.
Мин эрэ буолбакка, оҕолор бары олуһун астынан дуоһуйан, сайыҥҥы кэммитин олус интэриэһинэйдик атаарбыппыт диэн куруук үөрэ-ахта саныы сылдьыахпыт.
Көрсүөххэ диэри, улуу куорат Москва!
Вадим КОЛЕСОВ, Х кылаас, А.П. Илларионов аатынан Хайахсыт орто оскуолата, Чурапчы