VIII «Азия оҕолоро» норуоттар икки ардыларынааҕы спортивнай оонньууларыгар, бары билэрбит курдук, Монголия сүүмэрдэммит хамаандата кыттыыны ыла сылдьар. Чурапчытааҕы судаарыстыбаннай физическай култуура уонна успуорт институтун 6 сыл үөрэнэн бүтэрбит Монголия делегациятын салайааччыта Эрдэнэваанчиг Батбаатар VIII «Азия оҕолоро» оонньууларыгар кыттыы туһунан уонна саха тылын ханна үөрэппитин туһунан кэпсиир.
— Монголияттан уопсайа 63 киһи кэллэ, ол иһигэр 45 кыттааччы. Биһиги сүүмэрдэммит хамаандабыт 9 көрүҥҥэ кыттар: хапсаҕай, мас тардыһыы, кураш, алыш, самбо уонна д.а. Дойдубутугар Монголияҕа араас спорт көрүҥнэрэ сайдыылаахтар, сүрүннээн дзюдо, бокса уонна көҥүл тустуу. Ахсыс «Азия оҕолоро» норуоттар икки ардыларынааҕы спортивнай оонньуулар үрдүк таһымнаахтык ыытылла тураллар, барытын сөбүлээтибит, тэриллиитэ хас сылын ахсын үрдээн иһэр. Дьокуускай куорат эмиэ сайдан иһэр, 1996 сыллаахтан саҕалааан ыытыллар улахан тэрээһин билиҥҥэ диэри баарыттан үөрэбит. Бэйэм көҥүл тустуунан уонна сахалар мас тардыһыыларынан дьарыктаммытым, мас тардыһыыга маҥнайгы чемпионакка 3 миэстэни ылбытым. Билигин Монголияҕа мас тардыһыыта сайдан иһэр, манна 15 тыһыынча кэриҥэ киһи дьарыктанар, бэйэбит аан дойду таһымнаах чөмпүйүөннэрдээхпит. Саха тылын Чурапчыга үөрэппитим. Бакалавриаты алта сыл үөрэнэн бүтэрбитим. Аан бастаан кэлэрбэр сахалыы да, нууччалыы да билбэт киһи этим, кэлээт да саха тылыгар үөрэммитим. «Азия оҕолоругар» уруй-айхал!
Саха тылын монгол омук үөрэппит эбит буоллаҕына, биһиги норуот бэйэбит сахабыт тылын билиэх тустаахпыт. Монголияттан кэлбит ыалдьыттарбытыгар ситиһиилэри!
Монголия делегациятын салайааччыта сахалыы хайдах саҥарарын видеоҕа көрүҥ:
Анжелина Жданова.
Монтаж Николай Степанов, оҕо пресс-киинэ.
keskil14.ru