Хас биирдии киһи төрөөбүт, улааппыт түөлбэлээх, мин тапталлаах дойдум хатыҥнардаах-чараҥнардаах Чурапчым буолар. Сылын ахсын кэрэ көстүүлээх тутуулар эбиллэн Чурапчым тупсан, киэркэйэн иһэриттэн үөрэбин, астынабын.
Чурапчы нэһилиэгэр оҕону иитэр, билии киэҥ аартыгын арыйар 4 оскуолалаахпыт: С.А.Новгородов аатынан орто оскуола, С.К.Макаров аатынан гимназия, И.М.Павлов аатынан орто оскуола, Д.П.Коркин аатынан олимпийскай эрэллэри бэлэмниир спортивнай-интэринээт оскуола. Оскуола кэннэ үрдүк эбэтэр орто үөрэх кыһатын баһалыан баҕалаахтарга Чурапчытааҕы физическай култуура уонна спорт института, ону тэҥэ Чурапчытааҕы аграрнай-техническай колледж ааннара аһаҕастар.
Кырачааннар үүнэр-сайдар, иккис дьиэлэрэ кэриэтэ 7 уһуйааннаахпыт. «Радость» оҕо дьоҕурун сайыннарар киинигэр үөрэнээччилэр талааннарын таба тайанан сөбүлээн дьарыктаналлар. А.П.Гоголев аатынан музыка уонна искусства оскуолата оҕолору ырыа, үҥкүү кэрэ эйгэтигэр умсугутар. Оҕону, эдэр ыччаты чөл олоххо угуйар А.И.Федотов аатынан спорт уораҕайа уонна А.К.Софронов аатынан култуурнай спортивнай комплекс бааллара олус астык.
Нэһилиэкпитигэр киһи-аймах сөбүлээн сылдьар сирдэрэ: П.Е.Барахсанов аатынан сынньалаҥ кииҥ, В.И.Ленин аатын сүгэр кииҥ болуоссат, И.И. Кандинскай аатынан «Айыллаан» култуура киинэ араас интэриэһинэй киинэлэринэн, тэрээһиннэринэн элбэх киһи сүрэҕин сүүйэн үлэлии-хамсыы турар. И.Н. Винокуров аатынан «Айылгы» норуот айымньытын дьиэтэ олохтоохтору кэнсиэрдэринэн, истиҥ биэчэрдэринэн сэргэхситэр, ону тэҥэ кыраһыабай көстүүлээх сквердар бааллар.
Республикабытыгар Чурапчы улууһуттан төрүттээх киэҥник биллэр чаҕылхай дьоммут элбэхтэр, ол иһигэр улуу тренербыт Дмитрий Петрович Коркин, олимпийскай чөмпүйүөн Павел Павлович Пинигин, худуоһунньук Афанасий Петрович Мунхалов, шашкаҕа аан дойду хас да төгүллээх чөмпүйүөнэ Гаврил Гаврильевич Колесов. Ону тэҥэ биллиилээх суруйааччыларбыт Семен Степанович Яковлев — Эрилик Эристин, Василий Яковлев — Далан уонна да атыттар. Чурапчылар киэҥ туттар киһибитинэн буолар — Егор Афанасьевич Борисов, кини аатын библиотека-архыып, кииҥ уулуссабыт сүгэллэр.
Чурапчыбыт куруутун инники күөҥҥэ сырыттын, өссө да үүнэ-сайда турарыгар баҕарабын! Ханна да сылдьарбын куруутун дойдубун ахтабын-саныыбын, таптыыбын!
Трофимов Бэргэн хаартыскаҕа түһэриитэ,
Арианна Макарова, XI кылаас үөрэнээччитэ,
С.А. Новгородов аатынан Чуорапчы орто оскуолата