Ыал – олох төрдө, омугу сайыннарааччы, үчүгэй сиэри-майгыны иитээччи, көлүөнэттэн көлүөнэҕэ тиэрдээччи. Хас биирдии киһи төрдүн-ууһун билиэхтээх. Билиҥҥи оскуола оҕолоро бэйэлэрин төрүччүлэрин дириҥэтэн үөрэтэллэр. Ол курдук, мин эмиэ хантан төрүттээхпин-силистээхпин билээри, төрүччүбүн үөрэтэн саҕалаатым.
Ийэм Шестакова Виктория Дмитриевна Мэҥэ Хаҥалас улууһун Майатыттан төрүттээх. Филипп Гаврильевич Охлопков аатынан Майа орто оскуолатын, саха тылын уонна литирэтиирэтин учуутала. Аҕам Шестаков Егор Владимирович Таатта улууһун Туора-Күөлүттэн сыдьааннаах. Бэйэтин идэтинэн тимир ууһа, норуот маастара буолар.
Ийэм өттүнэн эбэм Павлова Анна Александровна Таатта Баайаҕатыттан силистээх-мутуктаах. Саха литирэтиирэтин төруттээчилэртэн биирдэстэрэ, Платон Алексеевич Ойуунускай аймахпыт буолар. Ол туһунан мин хос эһэм Попов Александр Иосифович кэпсээн турардаах. Хос эһэм олох кыра эрдэҕинэ, Ойуунускай ийэтин кытары тиийэ сылдьыбыттарын өйдүүр. Ийэтэ уолун үөрэххэ ыытарыгар көмөлөһөн, хос-хос эһэм уонна эбэм бэйэлэрин суөһүлэриттэн биири анаабыттар.
Ийэм өттүнэн эһэм Павлов Дмитрий Афанасьевич Мэҥэ-Хаҥалас Хаптаҕай нэһилиэгиттэн төрүттээх. Кини төрөппүт аҕата, ол эбэтэр, мин хос эһэм Устинов Иван Иванович Хаптаҕай сэбиэтин бэрэссээдэтэлинэн үлэлээбитэ. Онтон эһэбин хаан аймаҕыттан иитэ ылбыт аҕата Павлов Афанасий Семёнович Майа сэбиэтин бэрэссээдэтэлэ этэ. Чүүйэ, Хара, Павловскай, Хаптаҕай, киэһээҥҥи оскуолаҕа дириэктэринэн таһаарыылаахтык үлэлээбитэ. Хос эбэм Павлова Варвара Афанасьевна Майа орто оскуолатыгар нуучча тылын уонна литирэтиирэтин учуутала этэ.
Мин төрдүбэр сахалар эрэ буолбакка, атын омук хаана эмиэ баар. Ол курдук аҕам төрөппүт аҕата Куба сириттэн сылдьар уонна олорор. Онтон ийэм өттүнэн хос эһэм Иван Иванович төрүттэригэр татаардар бааллар. Ону билигин өссө үчүгэйдик, дириҥник, салҕыы үөрэтэр баҕалаахпын. Мин төрүттэрбинэн киэн туттабын! Оҕолорго сүбэлиэм этэ, бэйэҕит төрүччүгүтүн дириҥник хасыһан үөрэтиҥ, билиҥ!
Лилиана ШЕСТАКОВА, Майа лиссиэйин эдэр кэрэспэдьиэнэ, 10 кылаас үөрэнээччитэ, Мэҥэ Хаҥалас улууһа