Сааскы уһун өрөбүл кэмигэр төрөппүттэрбин кытта куоракка «Спид Стар» сахалыы киинэни көрбүппүт. Бу киинэҕэ мин сөбүлүүр артыыстарым Павел Ченянов уонна Иннокентий Луковцев сүрүн оруолу оонньообуттара. Киинэни көрө олорон, мин элбэҕи өйдөөбүтүм: холобур, кыыллар эмиэ дьон курдук үөрэр, хомойор, толкуйдуур, оннооҕор сатаан доҕордоһор эбиттэр.
«Спид Стар» сүүрдээччитин кытта хара маҥнайгыттан өйдөспүттэрэ: хаһаайына кинини чугаһатаары минньигэһинэн күндүлүүрэ, эйэҕэстик кэпсэтэрэ, имэрийэрэ. Сүүрүк ат тугу гыныахтааҕын, хайдах күрэхтэһиэхтээҕин, маныаха туох ирдэнэрин түргэнник өйдөөбүтэ.
Сүрүн дьоруойбут бастаан боростуой аттар турар сирдэрин ыраастааччы этэ. Ол сылдьан, кини ат сүүрдүөн баҕарар этэ, ону баҕа санаа оҥосторо. Табаарыһа Спид Старга хайдах курдук куһаҕаннык сыһыаннаһарын көрөн, аһынара, онтон сылтаан доҕорун кытта кыыһырсыбыттара. Доҕоро барбытын кэнниттэн, кини сүүрдэр буолбутуттан олус үөрбүтэ.
Аан бастаан бэйэтигэр Спид Стары чугаһаппыта, сымнаҕастык сыһыаннаспыта, ол кэнниттэн дьарыктаан саҕалаабыта. Бу уол холобуругар киһи сыал-сорук туруоруннаҕына, күүскэ үлэлээтэҕинэ, тугу баҕарар ситиһиэн сөп диэн киһи өйдүүр. Онон ханнык да ыарахаттарга киһи бэриниэ суохтаах, иннин диэки баран иһиэхтээх диэн эрэл санааны үөскэтэр.
Онтон Спид Стары маҥнайгы сүүрдээччитэ кырбыыр, атаҕастыыр этэ. Ону ат эмиэ өйдүүрэ, ол иһин киниэхэ арыллыбатаҕа, санаатын аспатаҕа, кыаҕын көрдөрбөтөҕө.
Киинэни көрөн баран, кыыл уонна киһи төһө даҕаны атын буолбуттарын, тылынан кыайан кэпсэппэттэрин иһин, өйдөрүнэн-санааларынан, майгыларынан син-биир дьон курдук ыкса доҕордоһуохтарын, чугас буолуохтарын сөп эбит диэн өйдүүгүн.
Айсана Охлопкова,
А.П. Рязанскай аатынан Соморсун орто оскуолатын VI кылааһын үөрэнээччитэ,
Амма улууһа.
keskil14.ru