Ханнык баҕарар киһи олоҕун араас кэмигэр сөбүлүүр, биһириир, бэл диэтэр, олоҕун кытта ыкса ситимниир туох эрэ холобурдаах буолар. Ол баҕар, аахпыт айымньыта, литературнай геройа, эбэтэр, көрбүт киинэтэ, биһирээбит киинэтин геройа буолуон сөп.
Мин ийэм, аҕам оҕо саастарын кэмигэр индеецтээх киинэни көрөллөрүн сөбүлүүллэр эбит. Ол иһин онно баар хорсун, ыарахан түгэҥҥэ баар буола түһэн, быыһыыр, аҕыйах саҥалаах, ол гынан баран, олус мындыр, өйдөөх Чингачкук оччотооҕу оҕолор холобур оҥостор геройдара эбит.
Оттон билиҥҥи ыччат көрөр киинэтэ, сөбүлүүр геройдара биллэн турар, атыттар. Билигин киинэ да арааһа олус элбэх. Урут омук, нуучча эрэ киинэлэрин көрөр эбит буоллахтарына, билигин биһиги бэйэбит киинэбит да элбэх. Сахалар оонньообут, устубут, туруорбут киинэбит аан дойду таһымыгар тахсан, биһирэбили ылла. Дьоллоох Дьокуускай куораппытыгар киинэ фестивала сыллата ыытыллар буолла.
Мин сахалыы киинэни, сериаллары көрөрбүн сөбүлүүбүн. Саамай сөбүлээбит, өйбөр хатанан хаалбыт киинэм – «Рядовой Чээрин». Бу киинэ суруйааччы Тимофей Сметанин «Егор Чээрин» диэн сэһэнин ис хоһоонунан уһуллубут. Саха литературатын уруогар аахпыт айымньыбын киинэ буолбутун көрөн олус астыммытым.
1943 сыллаахха немец кимэн киириилээх сэриитин кэмэ. Киинэҕэ саха саллаатын уратыта көстөр. Чээрин — булчут, киэҥ-холку майгылаах, ыксаабат-ыгылыйбат, мындыр толкуйдаах. Кини хорсун быһыыта, сатабыла сэрии хаамыытын уларытар да диэххэ сөп. Сүрүн геройу оонньуур Айтал Степанов тас көстүүтэ, артыыс быһыытынан талаана көрөөччүгэ олус биһирэтэр. Мин, биир бэйэм, наһаа сөбүлээбитим. Аахпыт айымньым геройа үүт-үкчү маннык буолуохтаах этэ, дии саныыбын. Салгыбакка хаста да көрөбүн уонна сырыы аайы үчүгэй өрүттэри эрэ булабын.
Бу киинэ саха буоларбынан киэн туттуубун өссө күүһүрдэр. Саха саллааттара сэриигэ бэргэннэрин, хорсуннарын, мындырдарын, доҕор-атас быһыытынан эрэллээхтэрин, ыарахантан чаҕыйбаттарын, киһи быһыытынан күүстээхтэрин көрдөрөр. Кэнчээри ыччат, оҕо-аймах көрөн, сэргээн холобур оҥоһуннун диэн айыллыбыт айымньы. Онон үчүгэйгэ эрэ иитэр, үөрэтэр киинэ, дии саныыбын.
Сааскылаана Бубякина,
Г.Г. Софронов аатынан Өлөөкө-Күөл
орто оскуолатын VII кылааһын үөрэнээччитэ,
Орто Халыма.
keskil14.ru