«Мин олоҕум бэйэм илиибэр»

Аныгы үйэҕэ дьон барыта сайдыылаах, туох барыта аһаҕас, киһи баҕарбытын барытын чэпчэкитик булар. Ол үчүгэй эрээри, элбэх киһи сыыһа-халты туттан, арааска барытыгар түбэһиэн сөп. Куһаҕан дьаллыктартан саҕалаан түөкүттэр дьону албынныыллара вирус курдук тарҕанан, элбээтэр элбии турар.

Биһиги нэһилиэкпитигэр Ытык Күөлтэн «Мин олоҕум бэйэм илиибэр» бырайыак чэрчитинэн, оскуола оҕолоругар, нэһилиэнньэҕэ аналлаах социальный десант буолан ааста.

Бастаан 5-6 кылаас үөрнээччилэригэр накааһы толорор Федеральнай сулууспа Саха сиринээҕи управлениетын инспектора Аина Петровна Аманатова, Уолбатааҕы фельдшерскай-акушерскай пуун сэбиэдиссэйэ Мария Иннокентьевна Никонова табах, электроннай сигарета буортутун туһунан сиһилии кэпсээтилэр. Салгыы норуот айымньытын дьиэтигэр 7-11 кылаастарга олоххо буолбут араас түбэлтэлэринэн сценка туруоран көрдөрүүгэ күрэхтэһии ыытылынна. Бары оруолларынан арахсан, 10-ча мүнүүтэ бэлэмнэнэн баран, бэриллибит түбэлтэни хайдах саныырынан, ситэрэн көрдөрдүлэр. Хас биирдии көрдөрүү кэнниттэн ыйытыыларга хоруйдаатыбыт, көхтөөхтүк кыттыбыт, кыһаллыбыт оҕолорго буклет туттардылар. Кылаастарынан миэстэлэри таһаарбыттара. Онно биһиги 11 кылааспыт кыайыылаах буолан таҕыста. Иккис миэстэ – 7-тэр, үһүс – 9-тар.

Кэрэхсэбиллээҕэ диэн, оҕолор эрэ буолбакка төрөппүттэр, учууталлар уонна олохтоох дьаһалта үлэһиттэрэ көхтөөхтүк кытыннылар. Төрөппүттэр элбэх буолан кинилэр туруорбут сценкалара олус интэриэһинэй этэ. Салгыы экспердэр үөрэх управлениетын сүрүннүүр специалиһа Альбина Михайловна Юмшанова, өрөспүүбүлүкэтээҕи психологическай киинтэн Людмила Васильевна Тистяхова, полицияттан Анжелика Александровна Владимирова санааларын иһиттибит.

Аныгы үйэҕэ куһаҕан дьаллыктар таһынан, түөкүттэр элбээбиттэринэн маннык үөрэтии, өйдөтүү үлэтэ ыытыллара наадалаах. Мин санаабар, маннык түгэннэри оҕолор бэйэбит сыанаҕа тахсан көрдөрбүппүт, ырыппыппыт ордук өйдөнүмтүө.

Ангелина ДАНИЛОВА, XI кылаас,

В.И. Ленин аатынан Уолба орто оскуолата, Таатта