«Хас биирдии киһи бу олоххо туох эрэ туспа хайысхалаах буолар» диэн элбэх дьонтон истибитим. Биһиги бу ыйытыыга эһээбитин ааттыахпыт этэ.
Эһээбит, Семён Платонов олус көрсүө, сэмэй, сытыары сымнаҕас майгылаах киһи. Кини кыыллары олус таптыыр. Билигин кини «ООО Давидофф» диэн тэрилтэҕэ үлэлиир. Манна кинилэр сылгылары, сүөһүлэри, араас кыыллары иитэллэр.
Маны таһынан сүүрүүк аттары дьарыктаан таһаараллар. Кыыллары көрүү-истии улахан үлэни, сыраны эрэйэр. Биһиги эһээбит онтон толлон турбакка, сылайбакка, сүрэҕэлдьиир диэни билбэккэ күн бүгүнүгэр диэри кыылларын олус таптаан, оҕолуу бүөбэйдээн кэллэ. Быйыл бу идэҕэ сылдьыбыта номнуо 40 сыла буолар. Кини идэтин олус сөбүлээн, бачча уһун кэмҥэ бэриниилээхтик үлэлии сылдьарынан биһиги киэн туттабыт.
Үлэлиир тэрилтэтигэр биһиги куруук сылдьааччыбыт, көмөлөһөөччүбүт. Эһээбит биһиэхэ куруук сүбэлии-амалыы сылдьааччы. Кини үөрэппитин сыыска-буорга түһэрбэккэ болҕойон туран истээччибит. Үлэлиир сирдэригэр конюшня, хотон, бэйэлэрэ олорор дьиэлэрэ барыта баар. Аттарын хаамтарар сирдэрэ эмиэ чугас, ол иһин үлэлииллэригэр барыта табыгастаах. Хас биирдии кыылга улахан болҕомтону уураллар.
Өссө конюшняны кытта сыста турар хостоохтор. Онно туох баар кыайбыт-хоппут бириистэрин барытын ууруна сылдьаллар. Бу барыта «ООО Давидофф» үлэһиттэрин үтүө өҥөлөрүнэн буоллаҕа.
Түмүктээн эттэххэ, үлэһит киһи диэн бэйэтин эрэ туһугар буолбакка, нэһилиэгин, улууһун, дойдутун туһугар үлэлиир киһи. Кини дьоҥҥо үтүөнү, дойдутугар сайдыыны, ону таһынан кыылларга тапталы биэрэр. Оннук холобур буолар киһибит биһиэхэ эһээбит. Кини үлэһит үтүөтэ, амарах аҕа, элэккэй эһээ. Чугас дьоҥҥутун харыстааҥ, куруук үөрдэ сылдьыҥ.
Семён, Уруйдаан, Уйгулаан ПЛАТОНОВТАР
V , VI кылаас үөрэнээччилэрэ
«АЛиК» медиа-киин, Л.В. Киренскэй аатынан Амматааҕы лиссиэй
keskil14.ru