Олунньу 22 күнүгэр Хатастааҕы И.Д. Панаев аатынан библиотека иһинэн үлэлиир «Эйгэлээнэ» коллекционердар түмсүүлэригэр Кэбээйиттэн «Харыстаана» коллекционердар түмсүүлэрин салайааччыта Зоя Яковлевна Сметанина уонна мин эбэм Александра Тихоновна Сивцева кыттан, элбэҕи билэн-көрөн кэлбиттэр. Бу быыстапкаҕа Муоматтан, Дьокуускайтан, Тааттаттан, Кэбээйиттэн кэлбиттэр.
Коллекционердар ууруна сылдьыбыт күндү малларын-салларын тэлгэтэн дьон көрүүтүгэр уурбуттар. Оҕо оонньуурдарын, открыткалары, брошьтары, сүүтүк арааһын, былыргы харчылары, иһиттэри-хомуостары аҕалан саалаҕа уурбуттар.
Мин эбэм былыргы ыраахтааҕы саҕанааҕы кумааҕы харчыларын, омук харчыларын муспутун кэпсээбит, көрдөрбүт. Зоя Яковлевна эмиэ муспут манньыаттарын кэпсээбит, көрдөрүүгэ уурбут. Эбэм сөҕө-махтайа көрбүтэ Муоматтан сылдьар коллекционер 100-кэ сэбиэскэй саҕанааҕы куукулалары муспут уонна Хаҥалас кыыһа 400 иискэ туттуллар сүүтүгү муспут.
Түмүккэ «Эйгэлээнэ» түмсүү салайааччыта Мария Сергеевна ыалдьыттарга Хатас туһунан кэпсээтэ, бастыҥ ааҕааччыларыгар, коллекционердарга эҕэрдэ тыл эттэ, наҕараадалары туттартаата. Эбээбэр Мария Сергеевна коллекцияҥ өссө элбии турдун диэн Сочи Олимпийскай манньыатын бэлэхтээбит.
Күндүүнэ Алексеева, 5 кылаас үөрэнээччитэ,
«Дьоҕур» пресс-киин, Кэбээйи орто оскуолата.