А.В. Чугунов аатынан Мэлдьэхси орто оскуолатыгар коммунарскай түмсүү буолан ааста. Бу түмсүүгэ ыалдьыт буолан Ф.К.Попов аатынан Баатара орто оскуолатын оҕолоро кэлбиттэрэ.
Бу тэрээһини, үгэс быһыытынан, хаһыс да сылын «Дьулуур» оҕо тэрилтэтэ «Түмэн» түмсүүнү кытта ыкса үлэлэһэн, сылын аайы саҥалыы тыыннаан, интэриэһинэй көрүүнэн ыыталлар. Тэрээһин аһыллыытыгар дириэктэри иитэр үлэҕэ солбуйааччы Юлия Петрова, оскуола эдэр үлэһиттэрин түмсүүтүн салайааччыта Туяра Игнатьева тыл эттилэр. Оскуола лиидэрдэрэ Ксения Игнатьева уонна Надя Баишева аһыллыы туоһутун, Россия былааҕын, өрө көтөхтүлэр. 
Бу тэрээһиммитин аныгылыы «Королевская ночь» да диэн ааттыахха сөп. Тэрээһин бэрт сэргэхтик, уратытык барда. Оҕолор уонна оскуола эдэр үлэһиттэрэ этэрээттэргэ арахсан, күрэхтэстилэр.
«Ураты волейбол», «Любовь вслепую», квест оонньуу, пааранан оонньуу, «Сааскы вальс», сасыһа оонньуу, киинэ көрүүтэ о.д.а. курдук оонньууларга бары астына оонньоотулар.
САССР 100 сыллаах үбүлүөйүн чэрчитинэн «Өрөспүүбүлүкэм 100 сылынан» диэн тиэмэҕэ оҕолор бэйэлэрин санааларын стикердарга суруйан хааллардылар. Ийэ сылынан аһаҕас камера үлэлээтэ. Оҕолор «Ийээ, эйиигин таптыыбын» диэн суруйан, ийэлэригэр тапталларын, баҕа санааларын тиэртилэр.
Баатара оскуолатыттан кэлбит ыалдьыттарбыт санааларын ыйыттыбыт.
Коля Афанасьев: «Маннык тэрээһиҥҥэ бастакыбын сылдьабын. Барыта наһаа үчүгэйдик ааста. Өссө биирдэ маннык тэрээһин ыытыллара буоллар, үөрүүнү кытта кэлиэм этэ».
Надя Баишева: «Мин санаабар, бүгүҥҥү тэрээһин олус интэриэһинэйдик ааста. Түүнү быһа утуйбатыбыт, араас оонньуулары оонньоотубут, оҕолору кытта билистибит».
Маннык тэрээһин үчүгэйэ диэн — оҕолору уонна учууталлары ыкса чугаһатар, бэйэ-бэйэттэн толлубат, кыбыстыбат, түмсүүлээх буоларга үөрэтэр. Кэллэктиип түмсүүлээх буоллаҕына эрэ, ханнык баҕарар эйгэҕэ өрүү инники буолар.
Уйгу Егорова, VIII кылаас, «Үктэл» эдкорпост.
Мэлдьэхси, Мэҥэ Хаҥалас.