Кулун тутар 16 күнүгэр, Мэхээлэчээн булчут» ( Мои таежные каникулы) киинэни суруналыыстарга, артыыстарга уонна устар бөлөххө көрдөрдүлэр.
Киинэ Тимофей Сметанин уонна Яков Стручков оҕолорго аналлаах «Мэхээлэчээн булчут кэпсээннэрэ» айымньыларынан «Сахабэчээт» тэрилтэ «УлусМедиа» сетевой таһаарыытын көҕүлээһиннэринэн уһуллубута. Режиссер Александр Лукин. Киинэ сүрүн уратыта — кымырдаҕастан саҕалаан тыа кыылларыгар тиийэ киһилии саҥараллара.
СӨ Инновацияҕа, сыыппара сайдыытыгар уонна инфокоммуникация технологиятын миниистирэ Петр Николаев саха киинэтин историятыгар аан бастакытын саҥа технологиялары (CGI) туһаммыттарын бэлиэтээтэ уонна киинэни уһулбут хамаандаҕа, киинэ уһулларыгар кыттыгастаахтарга махтал тылларын тиэртэ.
«Сахабэчээт» тэрилтэ генеральнай дириэктэрэ Ньургуйаана Стручкова киинэни 3 сыл устата устубуттарын уонна долгуйа киинэ сүрэхтэниитин күүтэллэрин эттэ. Сүрүн оруоллары Федот Львов, Дамир Дьяконов, Алгыс Макаров, Василий Борисов, Дьулустан Мухин, Айаал Винокуров, Данил Осипов, Юлия Мярина оонньообуттар. Уонна саха киинэтигэр бастакытын тыыннах Том диэн ааттаах эһэ оонньообут.
Киинэ сюжетыгар Мэхээлэчээн булчут сиэнин Мишуканы уонна кини ытын Сэргэҕи бултуур, балыктыыр үүтээнигэр илдьэ барар. Мишука эһэтин Мэхээлэчээни кытта араас мүччүргэннээх түбэлтэлэргэ түбэһэллэр.
Мэхээлэчээн булчут» ( Мои таежные каникулы)» киинэни Саха сирин бары киинэ тыйаатырдарыгар кулун тутар 19 күнүттэн көрүөххэ сөп.
Виктория КОЛОДЕЗНИКОВА