Бу ый устата биһиги, юнкордар, Тимофей Сметанин уонна Яков Стручков суруйбут «Мэхээлэчээн булчут кэпсээннэрэ» айымньыларын аахтыбыт. Олус көрдөөх, интэриэһинэй кэпсээннэр эбит диэн түмүк санааҕа кэллибит. Киһи Мэхээлэчээнтэн элбэххэ үөрэнэр. Бу урут суруллубут айымньы да буоллар, билиҥҥи кэмҥэ даҕаны олус табыгастаах, туһалаах, тоҕоостоох эбит. Киинэ буолан тахсарын олус күүтэбит!
Уруйдаан Тимофеев, С.П. Данилов аатынан Бэрдьигэстээх орто оскуолатын 5 “а” кылааһын үөрэнээччитэ:
Мин буойун суруйааччы Тимофей Сметанин уонна учуутал Яков Стручков «Мэхээлэчээн булчут кэпсээннэрин» сэргээн аахтым. Ордук «Этэрбэс чааркаан буолбуттаах» диэн тэттик кэпсээни өйдөөн хааллым. Бу кэпсээҥҥэ убай киһи балтытын көрөрүн-харайарын, булугас өйдөөх, ыарахаттартан куттаммат буоларын туһунан кэпсэниллибит дии саныыбын. Өйдөөн хаалбыт түгэним диэн балтыта сүүрэн иһэн этэрбэһэ түһэн хаалбытыгар, онно кырынаас чааркаан курдук тутуллан хаалбыт. Этэрбэһэ аҕаларын киэнэ буолан, кыыс сүүрэн истэҕинэ, көтөн хаалбыт эбит. «Мэхээлэчээн булчут кэпсээннэринэн» сотору киинэ тахсарын истэн бараммын, үөрдүм, долгуйдум аҕай уонна кылааһынан көрө барар эбиппит диэн оҕолорбор тутатына тиийэн кэпсээтим. Киинэни көһүтэбит аҕай!
Альберт Тарасов, С.П. Данилов аатынан Бэрдьигэстээх орто оскуолатын 5 «а» кылааһын үөрэнээччитэ:
«Тайах тэпсибит». Ый устата Тимофей Сметанин, Яков Стручков суруйбут «Мэхээлэчээн булчут кэпсээннэрин» аахтыбыт. Бу тэттик кэпсээннэр «Бэлэм буол» оҕо сурунаалыгар комикс быһыытынан киирбиттэрэ, ойуулуктаахтара олус интэриэһинэй уонна өйдөнүмтүө. Мин «Тайах тэпсибит» диэн кэпсээни олус сөбүлээтим. Манна Мэхээлэчээн атыыр тайаҕы ойуурга көрсөн, олоҕо быста сыыспытын, хайдах табаарыһа олохтон быыһаабытын туһунан суруллубут. Мин саныахпар, Мэхээлэчээн уол төһө да булчутун үрдүнэн, син биир өлөн эрэбин диэн куттаммыт буолуохтаах. Өскөтүн табаарыһа быыһыы кэлбэтэҕэ буоллар, туох буолуо биллибэт эбит. Оҕолорго «Бэлэм буол» сурунаалы ылан ааҕаргытыгар сүбэлиибин.
Никита Тарасов. С.П. Данилов аатынан Бэрдьигэстээх орто оскуолатын 6 «в» кылааһын үөрэнээччитэ:
«Эргэ балаҕан халҕанынан». Алын кылаастарга үөрэнэ сылдьан “Мэхээлэчээн булчут кэпсээннэрэ” тэттик кэпсээннэрин, Мэхээлэчээн мүччүргэннээх сырыыларын туһунан аахпыппыт. Олортон саамай өйдөөн хаалбытым – „Эргэ балаҕан халҕанынан“. Тугу өйдөөн хаалбыппын видеоҕа кэпсээммин киирэн көрүҥ, сэргээҥ.
Бу курдук айымньы туһунан бэйэбит санаабытын үллэстэбит. Олус сөбүлээн, интэриэһиргээн, сороҕор уйадыйан туран аахпыппытын этэбит. Оҕолорго эмиэ сүбэлиибит!
С.П. Данилов аатынан Бэрдьигэстээх орто оскуолатын «Сайдам» медиа киинин эдэр кэрэспэдьиэннэрэ, Горнай улууһа