Тимофей Сметанин уонна Яков Стручков «Мэхээлэчээн булчут кэпсээннэрэ» диэн кэпсээннэр хомуурунньуктара эрэ буолбакка, булт-алт сиэригэр-туомугар, булугас өйдөөх буоларга, төрөөбүт тылга, култуураҕа интириэһи уһугуннарар, дьиэ кэргэни ааҕыы муннугар түмэр айымньы.
«Сатаатахха – хонууга да күөгүлүөххэ сөп» диэн кэпсээни сэргээн Неустроевтар дьиэ кэргэттэрэ Мэхээлэчээн көрдөөх сырыыларыттан тэттик киинэ устубуттара.
Сүрүн оруолга оскуолабыт выпускнига Авдей Неустроев, билигин Култуура уонна ускуустуба колледжын устудьуона, оонньообута.
— «Мэхээлэчээн булчут кэпсээннэрин» аан бастаан кыра кылааска сылдьан аахпытым. Кэпсээннэрэ кылгас, уруһуйдардаах буолан, онон-манан күлүүлээх, көрүдьүөстээх буолан сөбүлээн аахпытым. Мэхээлэчээн булчут сөбүлээбит сэһэниттэн «Сатаатахха — хонууга да күөгүлүөххэ сөп» диэни дьоммун кытта тэттик киинэ оҥорон уһуллубуппут. Мин Мэхээлэчээн оруолун оонньообутум, ийэм Евгения бөрө буолбута, онтон аҕам Архип Мэхээлэчээн аҕатын оруолун толорбута. Мэхээлэчээн боростуой саха уола, айылҕаны кытта ыкса сибээстээх, сытыы өйдөөх. Мэхээлэчээн аҕатыттан саха быһаҕын ылан ойууру кэрийэ барар, ол кэрийэ сылдьан отону булан сиир, ол сырыттаҕына бөрө улуйарын истэр. Мэхээлэчээн куттанан куотан иһэн маска ыттар. Ол олорон толкуйдуур, хайдах бөрөнү өлөрөрүн. Саха быһаҕынан күөгү оҥостор, ол күөгэтин отонунан ньаҕайдыыр. Күөгүтүн быаҕа баайан баран бөрөҕө быраҕар. Бөрө эмискэччи ыйыстан кэбиһэн өлөн хаалар. Бу кылгас кэпсээн булугас өйгө үөрэтэр, — диэн Авдей кэпсиир.
Оскуолабыт үөрэнээччитэ Ефим Гаврильев, 10 кылаас, бэйэтин санаатын үллэстэр:
— Хас биирдии айымньы саҥаҕа, туохха эмит үөрэтэр диэн мээнэҕэ эппэттэр. Ол курдук, кылаас таһынан ааҕыыга Тимофей Сметанин «Мэхээлэчээн булчут кэпсээннэрэ» кинигэтин аахтыбыт. Кинигэ сүрүн ис хоһооно булка үлүһүйүүттэн саҕалаан, араас албастары туттуу, сыыһа-халты туттан, араас мүччүргэннээх, кутталлаах, көрүдьүөс да түгэннэргэ түбэһии буолар. Кинигэни ааҕан баран, булт сиэрин-туомун, оччотооҕу оҕолор булт албастарыгар мындыр өйдөрүн сөхтүм. Билиҥҥи олоххо уол оҕону иитии боппуруоһа сытыырхайан турар кэмигэр, бу кэпсээннэр олус тоҕоостоохтор дии санаатым.
Оҕолоор, «Мэхээлэчээн булчут кэпсээннэрин» ааҕыҥ, олох үөрүйэхтэригэр үөрэниҥ!
Бэлэмнээтилэр «Юла» медиа-киин эдкордара, Маар орто оскуолата, Ньурба.
keskil14.ru