Оскуолабыт бибилэтиэкэтигэр олус кэрэхсэбиллээх тэрээһини буолан ааста. Оҕолорго саха литературатын билиһиннэрии култуурабытын харыстыырга, төрөөбүт тылбытын сайыннарарга, дойдубут кэскилин түстүүргэ улахан суолталаах.
Оскуолабыт 2-с кылааһын үөрэнээччилэрэ буойун-суруйааччыта Тимофей Сметанин уонна Абый улууһун бастакы үөрэхтээх учуутала, суруйааччы Яков Стручков «Мэхээлэчээн булчут кэпсээннэрэ» кинигэлэриттэн «Куобах» кэпсээнин аахтылар. Бу айымньы дэриэбинэ олоҕун, булчут ураты дьылҕатын оҕолорго чугастык, ис сүрэхтэн көрдөрөрө хас да көлүөнэ дьону үөрдэр. Оскуолабыт бибилэтиэкэрэ Наталья Дмитриевна Лукина оҕолорго анаан презентация бэлэмнээн көрдөрдө.
Кини кинигэ ааптарын, «Мэхээлэчээн булчут» дьылҕатын уонна «Куобах» кэпсээн ис хоһоонун оҕолорго өйдөнүмтүө гына, харахтарын уотун уһугуннаран кэпсээтэ. Бу кэпсээн куобах туһунан эбии билиини биэрдэ. Куобах ханна үөскүүрүн, тас көрүҥүн, суолун-ииһин, киһиэхэ туһатын туһунан оҕолор сиһилии иһиттилэр, сэҥээрдилэр.
Кэпсэтии кэмигэр араас ыйытыктарга көхтөөхтүк эппиэттээтилэр, аахпыттарын ырыттылар, бэйэлэрин санааларын үллэһиннилэр. Ордук куобах оҕо курдук ытыыра соһутта, ону олус аһыннылар. Ол кэнниттэн тугу аахпыттарыттан уруһуйдаатылар. Хас биирдии оҕо куобаҕы бэйэтин хараҕынан көрбүтүнэн, сүрэҕинэн билбитинэн ойуулаата.
Маннык дьарыктар оҕоҕо ааҕарга эрэ буолбатах, айылҕаны таптыырга, кыылы-сүөлү харыстыырга, кинилэр олохторун өйдүүргэ үөрэтэллэр. Бу тэрээһин кэнниттэн 2-с кылаас үөрэнээччилэрэ «Мэхээлэчээн булчут кэпсээннэрэ» хомуурунньук атын кэпсээннэрин олус интэриэһиргээтилэр, ааҕар баҕаларын биллэрдилэр.
«Мэхээлэчээн булчут кэпсээннэрин» аахтарар тэрээһин сүрүн сыала ситиһилиннэ. Маннык дьарыктарга оҕолор сахалыы кинигэни ааҕарга уһуйуллаллар. Бибилэтиэкэбит уонна учууталларбыт күүстээх үлэлэринэн оҕолор өйбүтүн-санаабытын сайыннарабыт.
Алена НОЕВА, IX кылаас,
С.Д. Флегонтов аатынан Хадаар орто оскуолата, Чурапчы