Билигин Интернет ситимигэр сахалыы тыллаах, сахалыы тыыннаах оҕолорго аналлаах, кинилэр интэриэстэрин тардар бырайыактар бааллар эрээри, аҕыйахтар. Биһиги оҕолорбут төрөөбүт тылларын билиэхтээхтэрэ, төрөөбүт тылларынан саҥарыахтаахтара саарбаҕа суох. Билигин оҕо Интернет ситимигэр нууччалыы таһаарыылары көрөр. Ол аата саха оҕотун тулалыыр эйгэтин улахан аҥара атын омук тыла буолар.
Биир олус интэриэһинэй сахалыы контены таһаарар бырайыак мин болҕомтобун тарта. Ол туһунан бүгүн кэпсиэхпин баҕарабын. Бырайыак аата «Медиазона USTAR» диэн. Баҕар истибиккит буолуо. Бу туһунан бырайыак салайааччыта, ааптара, педагог Николай Васильевич Корякин сиһилии кэпсиир:
— «Медиазона USTAR» Росмолодежь грантовай бырайыага буолар. Бары билэргит курдук, быйыл «MUUStar» диэн ыччат фестивала буолбута. Ол онно 10 бастыҥ ыччакка туһуламмыт бырайыактаахтар истэригэр киирэммит, үп-харчы ылбыппыт. Бырайыакпыт сыала-соруга — Интернет ситимигэр оҕолорго аналлаах үөрэтэр уонна сааратар сахалыы тыллаах контент элбээһинигэр диэн. Ол курдук, «Атах тэпсэн олорон» подкаст, оскуола оҕолорун сүүмэрдэммит хамаандалара мустан оонньуур «Мустар» ток-шоу, «Туох буола турарый?» аһаҕас микрофон, тэттик киинэлэри оҥорон, тэрийэн, уһулан бэйэбит YouTube канаалбытыгар угабыт. Бу манна барытыгар оскуола саастаах оҕолоро кыттыыны ылаллар, бииргэ үлэлэһэллэр, сөбүлээн туран айар үлэҕэ кыттыһаллар. Онон оҕо интэриэһэ баар, ону тардыахха эрэ наада. Билигин социальнай роликтары устан саҕалыахтаахпыт.
Бэйэм салайааччы-педагог буоларым быһыытынан,Оҕо айар үлэтин дыбарыаһыгар бэйэм салайар куруһуогум иһигэр сылдьар оҕолор дьарыктаналлар, уопсайа 40-ча оҕо, ону таһынан ток-шоуга араас оскуолалартан оҕолор кыттыыны ылаллар. Онон бу бырайыак элбэх оҕону хабар уонна сүрүнэ — оҕо төрөөбүт тылынан саҥара, быһаарса, кэпсэтэ, төрөөбүт тылын таптыы, харыстыы үөрэтэр, иитэр, сайыннарар сыаллаах. Онон салгыы үлэлиибит, инникитин даҕаны элбэх араас идиэйэ, былаан баар.
Интэриэһиргээбит буоллаххытына, «Медиазона USTAR» YouTube канаалын ссылката: https://m.youtube.com/channel/UCVEDYMy3XyHdxJBBGwjAqrA
Инстаграм @mustar_com
Суруйда Анна СЛЕПЦОВА.